SHILLONG:
Ka Meghalaya Weightlifting Association ka la pynlong ïa ka jingjied ïa ki nongïalehkai rah nar mynta ka sngi ka 21 tarik bad lashai ka sngi ka 22 tarik Risaw hapoh ka ïing shnong (Community Hall) jong ka Mawlai Phudmuri.
Ka MWA ka pynlong ïa kane ka jingjied ïa ki nongïalehkai rah nar na bynta ba kin mihkhmat ïa ka jylla sha ka rynsan ïalehkai kaba heh hapoh shane ka thaiñ lam mihngi ka 2nd Northeast Olympic Games 2022.
Kane ka program ban jied ïa ki khynnah kiba don sap ha kane ka liang ka long ha ki ar bynta, kata ha ka liang jong ki kynthei bad jong ki shynrang.
Ha kane ka sngi la wan ban ïashim bynta da kiba bun ki nongrahnar kiba na kylleng ka thaiñ ri Khasi bad na ki gym bapher bapher kiba don hapoh Shillong ki la wan lang ha kane ka sngi.
Ka Weightlifting ne ka jinglehkai rahnar ka dei kaba la sdang ban paw ha kane ka ri ha kine ki sngi, watla ym pat lah ban ïohi ïa u soh hynrei ki sara ki la don; Ïa kane la sakhi ha ka jingïakren bad u President ka kynhun rahnar ne Weight Lifting na ka jylla Meghalaya u Bah Monshan Singh Gary Hynñiewta.
Ha ka jingïakren bad u Kynjatshai na ka liang u Bah Hynñiewta u la pynpaw ba watla kane ka jinglehkai kadei kaba la sdang naduh u snem 2003-05 hynrei ka dang long kumba dang shu sdang thymmai namar ka jingbym bïang ki tiar namar ka jingrem dor jong ki bad ka jingbym biang ki nonghikai ne ki coach bad haduh mynta mynne ki coach kiba ai jinghikai kim pat da biang pura namar ki dang dei hi kiba dang don hapdeng ka jingpyntbit ïalade bad kiba dang shu dep tang ka training na Assam.
Ïa kane u Bah Hynñiewta u la pynpaw hapdeng ba dang ïaid ka program na ka jingtynjuh ban jied ïa ki samla ban mihkhmat sha ka lympung jong ka lympung Northeast Olympic 2022 kaba ar ka ban sa sdang naduh ka 10 haduh ka 16 tarik u Naiwieng.
