TURA:
Ka jylla Meghalaya kaba la ïaid lynti mynta la 50 snem, kam pat biang pura ha ka jingpynbiang ïa ki tiar ki tar ïakehkai, lait noh ha Shillong, bad katto katne ki madan lehkai football ha Tura kim pat long kita ki stadium kiba shongdor.
Na ka bynta ka sorkar jylla hapoh ka jingïalam u Conrad K. Sangma, ka jingpynlong ïa ka Meghalaya Games ha Tura ka long ka kabu ban pynkiew ïa ka kam lehkai ha ka jylla bad ka jingmut u Conrad ban pynlong ïa ki jingïalehkai Olympic ha ki jaka bapher bapher kiba don ha ka jylla, ka la nang pynskuiñ ïa ki nonglehkai ba watla kim pat lah ban sei ïa ka sap, hynrei ki ïoh ïa ka lad ban ïakhun ym tang ha ka jylla, hynrei wat shabar ka jylla.
Ha kine ki sawtylli ki Meghalaya Games ba ladep, la pynlong ha ka nongbah ha kaba ki kam lehkai ki la nangkiew bad wat ki tiar lehkai ki la biang bha, bad kane ka mut ba ka District ka nang bteng ban nang pynbha shuh shuh ïa ki jinglehkai Olympic.
Ka bynta kaba 5 jong ka Meghalaya Games ka la long kaba heh bha ïa kaba haduh 23 tylli ki jinglehkai Olympic la pynlong sawdong ka sor Tura bad palat 3000 ngut ki la wan shim bynta, bad haba phai sha ka bynta kaba saw jong ka Meghalaya Games kaba la pynlong ha Shillong, la pynlong 19 tylli ki jinglehkai bad kumba 2500 ngut ki la poi ban shim bynta.
Ka jingrah ïa ka Meghalaya Games sha Tura ka la plie ïa ka jingkhang ki kam lehkai bad ka la kyntiew ruh ïa ka kam lehkai ha kane ka jaka kaba dei ka jingkwah bad jingphohsniew jong u Myntri Rangbah ka jylla.
Shibun ki jinglehkai kum ka siat khnam, ïa kura bad jingmareh ki kham kiew bha ha ki khynnah lehkai na ri lum Khasi – Jaintia namar ki la biang ka jaka kilan met.
Ka jingïakren halor ka Meghalaya Games la ka long ha ki rynsan social media ne ki khubor ka long tang ka jingsngew ki paidbah, hynrei la dei ban ai jingïaroh ïa ki nongpynïaid kiba la kit la bah ïa ka lyngkor ban pyntyllun ïa ki jinglehkai namar ki la beh ha baroh ki 17 tylli ki jaka pynlong jinglehkai bad ai jingtip halor ki jinglong jingman ha ka por kaba biang.
Ban tip thikna shuh shuh ïa ka jingïaid beit ïaid ryntih ki jinglehkai, ka la bha shibun ban peit lyngba ki lad pathai khubor, namar ha ki por mynshuwa kam don kano kano ka jingpynbit pynbiang ba pura hynrei mynta, baroh ki la kylla lut bad kaba kylla bha ka long ba ïa ki Medal Tally la pynmih lang tang hadien ki jinglehkai.
Ïa ki nonglehkai ba wan na kylleng ka jylla, ki la shah pynbiang nadon shadong ïa ki jingdonkam baroh tang mar ïa poi ha Tura, bad wat ïa ka bam ka dih la pynbiang bha bad kam shym la don kano kano ka jingkynthoh na ki nonglehkai.
Ïa ki jinglehkai, la ïohi shisha ba ki kynhun na Khasi – Jaintia ki la wan shakhmat ha kaba ka East Khasi Hills (EKH) ka la wan ha ka kyrdan nyngkong, bad sa ka Ri-Bhoi, West Jaintia Hills bad South West Khasi Hills ha ka kyrdan kaba saw, bud sa ka West Garo Hills, West Khasi Hills, East Jaintia Hills, Eastern West Khasi Hills, North Garo Hills, East Garo Hills South Garo Hill bad ka South West Garo Hills.
“Ka jingthmu jong ngi ban pynlong ïa ka Meghalaya Games ha Tura ka la long ba seisoh bad ngi kmen ba palat 3000 ngut ki nongïalehkai kim don kano kano ka jingkhñium ha kine ki hynriew sngi bad ka la long kaba jop. Da kine ki jingseisoh ban wanrah ïa ki tiar ki tar kiba biang, ngi ngeit ba ki rang bad ki thei ïalehkai jong ngi kin kiew sha jrong bad ban khur ïa ki takma kiba bun,” ong u rangïalehkai na Tura, u AM Marak.
“Kane ka long ka sien banyngkong ia ka Tura ban pynlong ïa kine ki rynsan ryngkat ki jinglehkai Olympics, bad kum u nongïalehkai, nga lah ban ong ba ka Tura kan sa pynkiew ïa ki riew donsap bad ngi kloi ban pdiang ïa kane. Ngi la don ki tiar ki tar ba biang bad kine hi kin ai mynsiem ïa ki samla ban wan shakhmat ban pyni ïalade ba ki lah shisha ban kiew ha ka kam lehkai. Nga kwah ruh ban ai khublei ïa ka sorkar jylla bad kito kiba trei nadien kiba la lah ban wanrah ïa ka jingjop,” ong u MLA barim u Billykid A Sangma, uba la jop ruh ïa ka jingïakhun Golf ha kane hi ka rynsan jong ka Meghalaya Games.”
