TURA:
Ka sorkar jylla mynta ka sngi ka la pynbna ba ka la ïoh ban kheit sa ïa uwei pat u soh ha ka liang jong ki jingtei ïa ka jaka ïalehkai ha ka histori jong ka jylla ha kaba ka la plie paidbah ïa ka jaka ïalehkai ba la ai kyrteng ka P.A. Sangma Sports Complex ha Tura West Garo Hills District ha ka 16 tarik Nohrpah, 2022 .
Ïa kane ka stadium la shna nyngkong eh ha u snem 2006 da u P.A. Sangma bad ka ai kyrteng ïa kane ka madan ïalehkai da ka M.P. Stadium. Kane ka madan ïalehkai ka la long shisha ka jingkyrkhu ïa ki nongïalehkai ha kaba ka ïohi ïa kiba bun jait ki jingïalehkai la pynïalehkai ha kane ka madan kum ka phutbol, athletics, bad kiwei kiwei de ki jait jingïalehkai.
Ha kane ka madan la ïoh ruh ban pynlong ïa ka lympung ïalehkai jong ka Tura Football League bad ïa ka Subroto Cup naduh ba la tei ïa ka. Kane ka madan ka la long ruh ka madan ba ju pynlong ïa kiba bun jait ki jingïalang kiba ym ïadei bad ka sports ruh hynrei khamtam ïa ka jingrakhe ïa ka Republic Day bad ïa ka Independence Day.
Ka.jingtei ban shna pynbna ïa kane ka madam la shimti da ka sorkar jylla ïa kaba la bei tyngka ruh da ka Ministry of Minority Affairs bad ka sorkar jylla. Kane ka madan ruh ka long kata ka madan kaba heh duh ha ri India kum ka pre-engineered composite football stadium kaba lah ban ngiam haduh 9500 ngut u briew.
Ha ryngkat ka jingtei ïa kane ka stadium ka P.A. Sangma Sports Complex sa don sa artylli ki indoor halls kiba dang shna mynta kiba kynthup ïa ka 25m x 20m swimming pool, badminton hall kaba don haduh 6 tylli ki courts, Table Tennis hall, 4 Squash Courts, Cafeteria, office bad ka administrative spaces.
Ka jingtei ïa kane ka complex ka la sdang naduh u bnai Kyllalyngkot jong u snem 2021, bad wat hapdeng ka jinglyngshop jong ka khlam, ka State Sports Council jong ka jylla bad ka kynhun jong ki nongshna ki la lah ban tei pyndep ban shna ïa kane ka stadium hapoh 2 snem.
Ha kane ka complex baroh kawei ka don lang ïa ka madan football stadium bad artylli ki indoor halls, kaba ka jingtei baroh ka la kot sha ka 127.7 Crore.
Ka sorkar ka kwah ba ki paid nongshong shnong shajan kane ka madan ba kin ïoh ban ïalehkai ha u phlang ba iaryngkat kyrdan bad kiwei ki ri ka pyrthei bad u paidbah hi baroh u la lah ban pyndonkam ïa kane ka madan hadien ka jingplie ïa ka.Ha kane ka sngi plie pyrda la don ruh ka jingïalehkai phutbol kaba la long hapdeng ka Meghalaya State team bad ka kynhun ïalehkai kaba la phah da ka North East United Football Club. La wan ban ïadon lem ryngkat da u Myntri Rangbah ka jylla u Conrad K. Sangma kum u kongsan, u James Sangma, Myntri ka koit ka khiah ka jylla kum u Symbud kongsan.
Ka sorkar ka la buh ruh ïa ka thong nam pynbha ban pynbit pynbiang ïa ki jaka ïalehkai ha kylleng sawdong jong ka jylla. Ka jingpynheh pynbha ïa ka madan JN Stadium (Polo Ground, Shillong) yn sa pyndep ha u bnai Lber jong u snem 2023.
Ka jingtei ïa ka indoor stadium kaba paka bha katkum kane ka juk kaba mynta kaba don ruh ïa ka jaka ïalehkai shooting range, badminton court, bad basketball court. Ka Wahiajer Stadium kaba don hajan Jowai kaba long kawei pat ka madan kaba ka sorkar mynta ka dang shna kaba yn sa pyni ha u bnai Kyllalyngkot 2023.
Naduh ba la thaw ïa ka Meghalaya Sports Policy ha u snem 2019, ka tnat Sports bad Youth Affairs ka la trei borbah na bynta ban pynbit pynbiang ki jaka ïalehkai kiba paka bad ka jingkyntiew ïa ki khynnah ïalehkai jong ka jylla. Kane ka kynthup ruh ïa ka jingïatreilang ka sorkar jylla bad ka Meghalaya State Olympic Association, kaba la kyntiew shibun bah ïa ka jingïalehkai sports hapoh ka jylla.Ka jingpynlong biang ïa ka Meghalaya Games hadien 16 snem kaba la ai mynsiem ïa ki jylla bapher bapher ban pynlong ïa ki jingïalehkai ha ka state-level multi-sports events. Ka lympung ïalehkai ba dang shu kut dang shen ka 2nd North East Olympic Games ka la long shisha ka jingjop ïa ka jylla, hadien ba ka ïohi ïa ki nongïalehkai ka jylla kiba la ïalehkai bha.
Ka sorkar ka la pyshlur ruh ïaki nongïalehkai ka jylla da kaba ai sha ki ïaka khusnam ba kin nang ïai trei shitom ban pyntbit pynnang shuh shuh ïalade ban kynjoh sha kata ka kyrdan kaba kham shaneng lyngba ki song pisa tyngka bad ki skhim baibam ruh. La kumba 4 Klur tyngka eiei ka sorkar jylla ka la dep phah sha ki nong ïoh bynta ha une u snem ba mynta.
Ka sorkar jylla ka lah sdang ruh ïaka STAR Talent Identification Program haka jingïateh lok bad ka Meghalaya State Olympic Association ha kaba 200 ngut eiei ki khynnah na kylleng ka jylla ki lah shah jied kum ki nonglehkai athlete kiba kham tbit ha kaba ki lah shah jied lyngba ka leh test ha ki rukom science. Kine ki kynnah lehkai kin sa nang hap ban leit lyngba ki training kiba pher bapher ban pynbha shuh shuh ïaka rukom lehkai jong ki.
Ïa kine ki program lane ki skhim la pynurlong da ka Department of Sports and Youth Affairs da ka jingthmu ban pynlong ïaka jinglehkai sport kaba pura ka ban wanrah ïaka jingjop sha ki kyrdan ïalehkai ban ïakhun shapoh ka ri bad ruh ka jingjop sha ki jinglehkai ba shabar ri ruh kumjuh.
