SHILLONG:
Ha ka jingïakhun jong ka ha ka North East Olympic Games ba nyngkong kaba la long ha Manipur (Tanushree Dasgupta) ha u snem 2018 ka Tanushree Dasgupta kaba dei na kane ka jylla jong ngi ka la rah ïa ka nam lahduh ha ka jingïakhun Table Tennis kaba dei ruh ka jingïakhun ba marwei (single).
Ka Tanushree mynta kaba la don ha lynti ban wanphai shapoh nongbah Shillong hadien ba ka lah leit ban mihkhmat ïa ka jaka pule jong ka ha ka tournament kaba lah long ha Chandigarh, tangba kata ka jingleit lehkai kong ka ruh kan long ka jingïarap ïa ka na bynta ban pynkhreh bha na bynta kane ka lympung ïalehkai ka ban sa long mynta u bnai. Ha kaba kan sa ai ka jingïakhun kaba eh bha ïa ki nongïalehkai kiba na ka jylla Assam bad Mizoram.
U nongïalehkai ka Meghalaya men’s No. 1, u Suranjit Dey, ïa mynta u dang don hapoh nongbah Kolkata na bynta ka jingpynkhreh jong u na bynta kane ka lympung ïalehkai ka ban sa long hangne ha Shillong.
Sa kiwei de ki nongïalehkai kiba la shah khot sha ka shlem ai jinghikai na bynta kane ka jingpynkhreh ki don kiba na Shillong tangba don ruh kiba dei na Pariong, Jowai bad na Nongstoin. Kine baroh ki la don ha ka jingpynkhreh kaba shitrhem bha na bynta kane ka lympung ïalehkai, ha kaba ki la pynleit jingmut ha ki jingkilan met ki jong ki ym duna ïa ka hynriew kynta na bynta kane ka lympung ïalehkai.
“Ngi don ka jingkyrmen ba ngin jop bun ki takma,” la ong u Bah Banshan Diengdoh coach jong kane ka kynhun Table Tennis. “Kine ki khynnah ïalehkai ki long kiba dang rit bha ha ka ‘rta ki dei ka lawei na bynta ka jylla ha ka jingïalehkai Table Tennis. Ha kawei pat ka liang, ka Tanushree kaba la heh ka ‘rta mynta kaba la ih la san bha ha ka jingïalehkai table tennis kan sa ïalehkai bha ban pynneh ïa ka nam ba ka lah rah ha u snem 2018 ha ka 1st edition jong ka North East Olympic Games kaba la long ha Manipur.”
Kane ka thei ïalehkai na ka Jylla ka dang don jingkyrmen ba kan ïai bat biang ïa kane ka nam ba ka la bat mynta 4 snem namar ka long kum ka kabu na ka bynta jong ka namar ba ïa kane ka lympung la ïoh ban pynlong ha Shillong. Ka jingïai pynkhreh jong ka na ka bynta kane ka lympung ka la buh lypa ïa ka jingjop ha kane ka jingïakhun.
