SHILLONG:
Ka Meghalaya ka la lah ban pynpaw ia ka jingtbit na ka bynta ban khur ia ka nam lahduh ha ka jingialehkai Athletics jong ka 2nd North East Olympic Games 2022 ha ka sngi Ba-ar.
Kane ka kynhun ialehkai ka Jylla ka la lah ban khur haduh 15 tylli ki takma ksiar ryngkat 9 tylli ki takma rupa bad 17 ki takma rnong. Haba khein lang ka Meghalaya ka la khur haduh 41 tylli ki takma tang na kane ka jingialehkai.
Ha ka 1st North East Olympic Games 2018 kaba la long ha Manipur, ka Meghalaya ka la lah ban khur tang kawei ka takma ksiar, hynrei mynta u snem ka la lah ban pynpaw ia ka jingtbit lyngba ka jingtrei shitom lang ki nongialehkai, ki coach, ka Meghalaya Athletics Association bad ka tnat ialehkai jong ka Sorkar Jylla
Ka Assam ka la wan ha ka kyrdan ba-ar da kaba khur 12 ki takma ksiar, 6 ki takma rupa bad 2 tylli ki takma rnong. Ka Manipur ka la wan ha ka kyrdan ba-ar ha kaba ka la khur 10 tylli ki takma ksiar, 14 ki takma rupa bad 9 ki takma rnong.
Ka Nagaland ka la ïoh ban khur 9 ki takma ksiar, 4 ki takma rupa bad 10 tylli ki takma rnong, katba ka Tripura ka la khur 2 ki takma ksiar, 7 ki takma rupa bad 7 ki takma rnong. Ka Arunachal Pradesh ka la khur tang kawei ka takma ha baroh ar tylli ki kyrdan ialehkai, katba ka Sikkim ka la khur 5 tylli ki takma rupa bad kawei ka takma rnong bad ka Mizoram ka la khur tang kawei ka takma rupa.
Te kumta ka Meghalaya ka dangduna sa tang 2 point ia ka Arunachal Pradesh kaba dangiai bat ia ka kyrdan balai ha ka NEOG 2022, haduh ka por 7 baje mynmiet. Kumba ka long mynta ka Arunachal ka dangtam 34 la 32 ki takma. Ka Assam ka la bat ia ka kyrdan ba hakhlieh ha kaba ka la kamai 71 tylli ki takma ksiar bad ka Manipur kaba la wan ba-ar ka la kamai 68 ki takma ksiar.
