SHILLONG:
Ka kynhun ïalehkai phutbol jong ka jylla Meghalaya ka la jop ïa ka jingïalehkai kaba nyngkong jong ki ha ka lympung ïalehkai jong ka Khelo India Youth Games.
Ka Meghalaya ka la lah ban pynliem noh ïa ka Odisha da 3 la 1 ha ka jingïalehkai kaba ka long hapoh Indore, Madhya Pradesh.
U samla Cannyson Kharnaior uba long u rangïalehkai jong ka jylla u la ïoh ban thep ïa ka kol kaba nyngkong eh jong ha ha kane ka jingïalehkai ha kaba u la ïoh ban thep ïa ka kol ha ka minit kaba 16 jong ka kylla step.
Tang hadien 21 minit ba u Cannyson u la thep ïa ka kol kaba nyngkong, u rangïalehkai ka Meghalaya u Fashioning Syngkli u la ïoh ban thep biang ïa ka kol na bynta ka kynhun jong u ha ka minit kaba 37 jong ka kylla step bad haduh ban da kut ka por ïalehkai jong ka kylla step ka Meghalaya ka la tam da 2 kol ïa ka Odisha.
Haba phai sha ka jingïalehkai jong ka kylla miet ka Odisha ka la ïoh ban pynphai ïa ka kol ha kaba u nongïalehkai jong kane ka Odisha u Jitendra Kumar Birua u la ïoh ban thep ïa ka kol ha ka minit kaba 77.
Ha shuwa ban kut ka por ïalehkai jong ka kylla miet ka Meghalaya ka la ïoh ban thep sa pynkhih biang ïa ka jar jong ka kol ha ka sien kaba lai ha kaba u Daohipaia Rymbai u la ïoh ban thep ïa ka kol kaba lai na bynta ka kynhun ïalehkai jong u ka Meghalaya ha ka minit jong ka extra time kaba 90+4 jong ka kylla miet. Ka kynhun ïalehkai jong ka Meghalaya mynta kan sa ïalehkai pyrshah ïa ka West Bengal ha ka jingïakhun jong ka Group-B mynta ka sngi saitjain ha ka por 2:30 janmiet ha Emerald Heights International School Football ground, Indore.
