NONGPOH:
Ka Mawrathud Sports Club, ka la ïoh ban khur ïa ka namjop kaba nyngkong haba sdang ka lympung ïalehkai phutbol kaba la tip kum ka 1st FKJGP Christmas Cup Football Tournament ha madan Tyrso, kata hadien ba ka la lah ban pynliem noh pyrshah ïa ka Nangïaikiew Academy da 1-0.
Khyndiat haba phai sha katei ka jingïalehkai, ka Mawrathud SC ka la ïoh ban lamkhmat ban pynkhih jar ha ka minit ba 20 bad kaba la neh haduh ba kut ka kylla step. Haba bteng ka kylla miet ka jingïakhun ka la nangshong shit , hynrei haduh kaba kut ki rangïalehkai ka kynhun ïalehkai jong ka Nangïaikiew kim lah ban pynphai ïa katei ka kol kaba ki la shah thep bad kiba la hap ban pdiang ïa katei ka namrem.
Ïa katei ka lympung ïalehkai, la wan ban plie pyrda da u Bah Arkin Khonglam, Sports Secretary ka FKJGP Sengkmie, ha ryngkat ka jingdon u Bah Hilary Shadap, President FKJGP Tyrso Circle lem bad shibun ngut ki riew rangbah na katei ka thaiñ.
