JOWAI:
Lyngba ki 3 kol khur jingjop ka Dulong Sports Club ha ka jingïakhun pyrshah ïa ka Demthring Sports Club ha ka lympung jong u Chatister Kharkongor Memorial Trophy 1st Division Tournament 2022 kaba lah pynlong bad pynïaid da ka West Jaintia Hills District Sports Association kaba la long mynta ka sngi hapoh Kiang Nangbah Stadium.
Ha kane ka jingïalehkai ka Dulong SC ka la pynliem noh ïa ka Demthring SC da 3-1 ha ka jingïakhun jong u Chatister Kharkongor Memorial Trophy 1st Division Tournament 2022.
Ki rangïalehkai jong ka Dulong SC kiba la thep ïa ki lai kol ha kane ka sngi ki long u Dao Chwa Shylla uba ha kane ka sngi u la ïoh ban thep ar kol kata ha ka minit kaba 2 bad ha ka minit kaba 16 jong ka kylla step bad u Wallam Jingsuk Suting u la ïoh ban thep ha ka minit kaba 68 jong ka kylla miet.
U nongïalehkai jong ka Demthring Sports Club ha kane ka jingïakhun u lah ïoh ban pynphai ïa ka shi kol u long u Spain Ryngkhlem uba lah thep ïa ka kol ha ka minit kaba 64 ha kane ka jingïalehkai pyrshah ïa ka Dulong Sports Club.
Da kane ka jingjop ka Dulong Sports Club ka la khur ïa ki lai poiñ ha kane ka jingïakhun mynta ka sngi pyrshah ïa ka Demthring Sports Club ha kane ka lympung ïalehkai jong U Chatister Kharkongor Memorial Trophy 1st Division Tournament 2022.
Ïa ka jingïakhun ba la dep ban pynsangeh, yn pynïakhun ha ka sngi nyngkong kata ha ka 7 Naiwieng, ka jingïakhun ba nyngkong kan long hapdeng ka Chilliang Raij pyrshah ïa Moosalyngkat (por 12 baje noh phaisngi) katba ka Mukhla Raij kan ïakhun pyrshah ïa ka Wahiajer ha ka por 2:30 noh phai sngi.
