SHILLONG
Ka sorkar Meghalya hapoh ka jingïalam jong u Myntri Rangbah, Conrad Sangma ka la pynbna ba kan sa sdang noh kham kloi ïa ka jingtei na ka bynta 8 tylli ki madan mareh, 10 tylli ki indoor hall, 30 tylli ki madan ïalehkai phutbol ki ban siang da u phlang plastik bad 5 tylli ki madan ki ban siang da ki phlang ba shu thung (natural turf) ha ka jylla. Ïa kane ka khubor la pynbna ha ka jingai jingkren ha ka sngi ‘Independence Day’, kata ha ka 15 Nailar.
“Ka jingthaw ïa ki lad ki kabu na ka bynta ki khynnah bad ki samla ban kiew sted ha ka kam ïalehkai (sports) hapoh ka jingpeit ka sorkar jong nga” ong u MR halor ka jingkhie im biang ka Meghalaya Games 2020, ka jingïoh ïa ka kabu ban pdiang (host) ia ka North East Olympics Games mynta u snem, ka jingpynkha bad tei ïa ki jaka ïalehkai bad khamtam ka jingkyrshan ïa ki seng kiba khmih ïa ka kam ïalehkai ha ka jylla”.
U la kdew ruh kyndiat halor ka jingpynthymmai ïa ka madan JN Stadium bad ka indoor Stadium ha Shillong, ka PA Sangma Integrated Sports Complex ha Tura bad ka Wahiajer Stadium ha West Jaintia Hills yn sa pyndep noh shen.
“Ha kine ki san snem ban wan ngin shna ïa ki indoor hall, ki madan mareh (tracks), ki madan ïalehkai phutbol ha man ki distrik, sub-divisional bad ki block headquarter” ong u Sangma.
Ha une u snem ba lah dep ka sorkar ka la pyllait ïa ka STAR programme ban ithuh ïa ki samla kiba don sap kiba lah ban ïoh ïa ka jinghikai bad ka jingpyni lynti na ka bynta ban kylla long ki nongïalehkai kiba tbit da ka jingthmu ban pynlah ïa ka Meghalaya ban mihkhmat ia ka India sha ka 2032 Olympic.
Hynnin ka sngi ka 16 Nailar, u MR u la ïakynduh ïa 9 ngut ki nongïalehkai kiba la shah jied na ka bynta ban ïoh ïa ka jinghikai ba kyrpang. “Ka Sorkar ka la rai ban pynlut haduh T. 75 lak ïa iwei pa iwei ki nongïalehkai ba tbit tam” pynbna u Conrad.
