SHILLONG :
Ka Meghalaya State Karate-Do Association (MSKDF) ka ba la leit ban ïa shim bynta ha ka 5th National Open Zendokai Karate Championship kab la pynlong da ka All India Zendokai Karate-Do Federation (AIZKDF). Ïa kane ka lympung la sdang naduh ka 21 tarik bad kut pat ha ka 23 tarik Nohprah 2022 ha Nongbah Delhi, Vasudevam School Indoor hall, B-Block, Sector14, Prashant Vihar, New Delhi.
Ki khynnah kiba ka leit ban ïashim bynta ha kane ka lympung ïalehkai ki la ïoh ban wanrah ïa ka jingai khrismas (Christmas Gift) ïa ka jylla Meghalaya ha kaba ki la ïoh ban khur haduh 56 tylli ki takma ha kaba 26 tylli ki takma ksiar, 20 tylli ki takma rupa bad 10 tylli ki takma rnong.
Ïa Kane ka kynhun ïalehkai la lam khmat da ka kong Anita Songthiang, Baremdor Kharmuti bad u Lameshwa Majaw kum ki Official na ka Jylla.
Lah ban pynpaw hangne ba ka All India Zendokai Karate-Do Federation (AIZKDF) ka dei ka Karate Style ka ba la dep ithuh da ka Karate India Organization (KIO) kaba la long khlieh da u Hansh Bharat Sharma kum u mentor bad Founder Ka KIO, u Vijay Tiwari President, bad u Sanjeev Kumar Jangra, Secretary General ka KIO kaba long pat ka dkhot ba pura jong ka World Karate Federation (WKF) kaba la ithuh pat da ka International Olympic Committee (IOC).
Kane ka jingjop ka long shisha ka burom ïa ka jylla hi baroh kawei. Ka Meghalaya State Karate-Do Association (MSKDF) ka kyrpad ïa ka Meghalaya State Olympic Association (MSOA) ba kan ai noh ïa ka jingithuh kham kloi ïa kane ka seng kaba la dep ithuh mynta da ka Karate India Oranization (KIO), AKF bad World Karate Federation (WKF) khnang ba ka jingïalehkai Karate ha ka State kan long kaba ïaid beit ïaid ryntih .
