SHILLONG:
Ka Khasi Students’ Union myn ha ka 28 tarik u Naiwieng 2023 hapoh ka jingïalam jong u Samla Eric Nongkynrih, Sport Secretary ka Seng ka lah ïoh ban ai jingïarap ïa ki Samla ki ban mih khmat sha ka National Youth Champion League ka ban long ha ki tarik 8-10 jong u Nohphrah 2023 ba lah pynlong da ka Pro MMA League hapoh Priyadarshini Youth Complex, Malund West, hapoh ka nongbah Mumbai.
Ka Seng ha kane ka sngi ka lah ïoh ban noh synñiang lang sha ki 4 ngut ki samla ki ba mih khmat lyngba ka Shlem School of Martial Arts kaba don hapoh Mawlai Iewrynghep.
U Samla Eric ha ba ai jingkren u la kyntu kynpham bad ba kitei ki samla ki ban mihkhmat ba kin trei shitom ban ïoh ïa u soh ka jingjop ha ka jingïakhun ka jong ki bad kumjuh ban ïai kyntiew lem ïa ki para samla namar ka jingïalehkai sports ka dei ka wei ka lad ka lynti ka ban pynjngai ïa ki samla na ki jingdih pynbuaid kiba kyrni kum u drok u ba lah kynrei bha hapoh ka jylla jongngi.
Kumjuh u la pynkynmaw ruh ïa ki sienjam kiba ka Seng ka lah shim ha kaba ka la plie ïa ka Maitshaphrang MMA and Fitness Team hapoh ka shnong Nongthymmai kum kawei na ki shlem ban ai jinghikai ïa ki Samla ha ka liang ka kilan met bad kumjuh ban ban kyntiew ïa ki Samla ha ka kam ïalehkai.
