JOWAI:
Ka Khasi Student Union (KSU) Thangrain Unit, kaba hap hapoh ka KSU Chilliang Myntang Circle ka la ioh ban plie pyrda ïa ka 1st Maitshaphrang Knock-Out Football Tournament 2022, kaba long kum shi bynta ban kyntiew ïaka kam lehkai Football hapoh ka shnong ka thaw bad ka thaiñ baroh kawei.
Ha kane ka kynti ka seng ka la shim ïa kane ka kabu ban pynlong ïa kane ka lympung kum shi bynta ban pynkiew ïaki samla donsap bad ban ai mynsiem ïa ki ba kin nym ngop ha ki jingdih ba bun jait.
Ïa kane ka lympung ïalehkai phutbol la pynlong ha Madaw Ïawmuchai (Thangrain) bad la wan ban plie pyrda da u Agustan Timung uba long u Organizing Secretary jong ka KSU-JHDU kum u kongsan ha kane ka sngi, haka jingïadon lang u Secretary shnong Loadstar Nong-jngi, u samla Daeimi Liam President ka Shilliang Myntang Circle, ki nong-ïalam bad ki dkhot jong ka KSU Thangrain Unit bad ki nongshah khot sngewbha.
Ha kane ka sngi sdang ka jingïalehkai la long hapdeng ka Eagle FC (Mynsngad) pyrshah ïaka Turchaphrang FC (Thadbamon) bad ka Eagle FC ka la lah ban pynliem noh ïaka Turchaphrang da 2-0.
