SHILLONG:
U Myntri ba peit ïa ka tnat Sports & Youth Affairs ka sorkar jylla u Bah Banteidor Lyngdoh, u la mih shakhmat ban pynpaw ïa ka jingkmen bad ïa ka khmat kaba phuh samrkhie bad ka mynsiem kaba sngewkmen hadien ba ula ïoh ban pdiang ïa ka khubor shaphang ka jingïoh ban khur takma jong ki katto katne ngut ki nongïakhun kti jong ka jylla ne ki arm wrestler kumba ju khot ha ka ktien phareng, ha kane ka rynsan kaba heh ki ki nongïakhun kti ki la mih ban leit shim bynta ban ïalehkai ha ka lympung ba la tip ïa ka kum ka 2023 WAF World Arm wrestling bad Para Armwrestling Championship kaba la long ha sor bah Antalya, jong ka ri Turkey.
Kum ban shu pynkynmaw khyndiat ba ka long ka jingsngew sarong ïa la ka jaidbynriew baroh kawei ba ka kong Margareth Pathaw kaba dei na ka shnong Umsning ka la wan nyngkong eh ha kaba kaba la ïoh ban khur ïa ka takma ksiar na ka jingïakob ïakhun kti kaba hap ha ka thup jong ki kynthei kiba hapoh 60 kg, kaba dei ruh ka wat jong ka jingiakhun ha ka kti kadiang (left hand) bad hadien ba ka la lah ba kan pynliem noh ïa ka Santos Anna kaba dei na ka ri Brazil bad hadien kane, ka khubor kaba la ïoh lum ka ïathuh ba ka Kong Margareth ka la ïoh ruh ba kan khur wat ïa ka takma rupa na ka kyrdan ïakhun jong ki kyrdan Masters kaba la wan hadien ba ka la la ban pynliem noh ka thei ïalehkai jong ka ri Canada.
Ka Kong Angel Mary Mylliem Umlong ruh ka long kawei na ki nongïakhun kaba la ïoh ban khur ïa ka takma rnong, bad kumjuh ruh u Alexander Lyngdoh uba duna ruh ha ka bor iohsngew u la ïoh ban khur ia ka takma rnong ha ka thup jong ki shynrang kiba bym lah iohsngew bad kiba hapoh ka 80 kg.
Haba kren bad ki lad pathai khubor, na ka liang u Bah Banteidor u la ong ba ha kane ka kynti kaba mynta na ka liang ka tnat sports ka la ïarap ïa kane ka kynhun kaba la wanrah kylla ïa ka burom ïa ka jylla namar dei ban kynmaw ba ha kane ka kynti kine ki nongïalehkai ka jylla ki la mihkhmat ïa ka ri India baroh kawei.
Haba kylli ïa ka tnat Sports hato kan pynlong ne em ïa ka jingpdiang burom ïa ka kine ki nong ïalehkai ynda haba ki la wanphai sha la ïing, u bah Banteidsor u la ong ba kane ka dei ka kam kaba hakhmat duh ba yn buh, u la bynrap ruh da kaba ong ba kan ym dei bad kan ym lah da lei lei ba ka sorkar kan ïaid lait khlem da pynkup burom ïa kine ki nongïalehkai kiba lah wanrah ïa ka nam ka burom ïa ka jylla bad ïa ka ri India Baroh kawei.
Ka jinglah jong ka Kong Margareth ban khur 2 tylli ki takma ha kane ka lympung kaba dei ruh ka jingmihkhmat ïa ka ri baroh kawei kan ïoh ïa ka jingithuh ïa ka shimet bad ïa ka jylla Meghalaya kaba la pynkha shibun ïa ki nongïalehkai ban ïai pynsngewsarong ïa ka ri India baroh kawei.
