MAWKYRWAT:
Ka Wahkaji Sports and Cultural Club ka la pynliem noh ïa ka Myriem S.C da 5-4 lyngba ka jingïashut penalti ha ka jingïakhun jong ka lympung 2nd Invitation Tournament ba la pynlong da ka Ïatyllilang Sports & Culture ha Umdohlun South West Khasi Hills District.
Ha kane ka jingïakhun jong ka kylla step ka Myriem ka la ïoh ban pynkhih jar nyngkong, kata da 2 kol hynrei ka Wahkaji ka la ïoh ban pynphai noh ïa kine ki 2 kol da ka jingïoh thep jong u Kynsaibor Thongni baroh 2 kol bad ïa ka kol kaba nyngkong la ïoh ban thep lyngba ka jingïarap (assist) jong u Bapherbak Nonglang.
Haba phai pat ha ka kylla miet ka Myriem ka la ïoh ban thep sa 1kol hynrei khlem da pynslem ka Wahkaji ka la ïoh ban pynphai biang lyngba ka kol jong u Firstbornson Thongni. Haduh ban da kut ka minit ïalehkai kine ki kynhun ki khlem ïohlad shuh ban thep kol hynrei la hap ban pynkut noh ïa ka jingïakhun lyngba ka penalti.
Ha ka jingïashut penalti u rangapkol jong ka Wahkaji u la ïoh ban kem ïa kawei ka kol bad dei lyngba kane ka kabu ka Wahkaji ka la ïoh syndon ïa ka jingjop lyngba ka jingshut pynkut jong u Firstborn uba la thep ban pynjop syndon ïa kane kol.Lyngba kane ka jingjop ka Wahkaji kan sa ïoh ban ïakhun ïa ka Quarter ha ka 7 tarik Nohprah ha ka por 12:30 nohphaisngi.
