MAWKYRWAT:
Ka jingïakhun hapdeng ka Wahkaji S&CC pyrshah ïa ka Pynden-lyngdoh SC ka la kut noh ha kaba ka Wahkaji ka la ïoh ban khur ïa ka jingjop da ka jinglah ban thep da 3-0 ha ka jingïakhun jong ka lympung 2nd Division Mawkyrwat District Sports Association (MDSA) ha Madan MDSA Artificial turf Mawkyrwat.ïa kane ka lympung la plie ha ka 7 tarik Risaw 2022 ha kaba u Bah L.Tariang ADC South West Khasi Hills District u la long kum u Kongsan.
Ka jingïakhun ha kane ka sngi ka la kham noh shilliang namar ka jingtbit jong ki rangïalehkai ka Wahkaji ban pynshad ïa ki rangïalehkai ka Pynden-lyngdoh khamtam ha ka jingitynnad ka rukom thep kol.
Naduh ba sdang ka minit ïalehkai ka Wahkaji ka la ïai pyrshang ban ïoh pynkhih jar nyngkong hynrei haduh ban da kut ka kylla step kane ka kynhun ka khlem ïoh ïa ki kabu ba biang ban ïoh thep kol, dei tad ha ka jingïakhun jong ka kylla miet ba ka Wahkaji ka la ïoh ban thep ïa ka kol kaba nyngkong da u Kyntiewdor Nonglang lyngba ka jingïarap (assist) jong u Bapherbak Nonglang uba dei ruh u para jong u Kyntiewdor, u kyntiew u khlem u dang shu ïoh ïa ka lad ban mih hadien ka kylla step hynrei ka jingtbit jong u ban thep kol ha kane ka jingïakhun ka la pynïoh mynsiem ïa ki rangïalehkai ka Wahkaji ban pynskhem shuh shuh ïa ka nongrim khamtam ban khur ïa ka 3 poiñ ha kane ka sngi.
U Firstbornson Thongi uba la ïoh ban thep 2 kol ha ka jingïakhun pyrshah ïa ka Domtynrong YC&CC ha ka 21 tarik Risaw, mynta ka kynti ruh u la lah ban ïarap biang ïa ka kynhun da kaba u la ïoh ban thep biang 2 kol ha kane ka sngi bad ïa ka kol kaba ar ba u Firstborn la ïoh ban thep ha kane ka sngi ka dei lyngba ka jingïarap (assist) jong u Kyntiew.
Watla ka Pynden-lyngdoh ka la shah thep 3 kol ha kane ka sngi hynrei la sakhi ba ki rangïalehkai jong kane ka kynhun ki khlem pyni satia ïa ka jingkynran dien bad ka jingduh bor hynrei ki la ïakhun tyngeh ban ïoh pynphai ïa kine ki 3 kol, hynrei namar ka jingskhem ki rangïalehkai dien bad ka jingtbit jong u rangapkol ka la pynduh bor bad buit ïa ki ha kane ka sngi ban ïoh ïa ka jingjop.
Ka Wahkaji ka la ïoh mynta 7 poiñ na ki 4 sien ba ki la dep ban ïakhun ha ka lympung 2nd Division ka MDSA.
