SHILLONG:
U Myntri ba khmih ïa ka tnat Sports and Youth Affairs ka Sorkar jylla u Bah Banteidor Lyngdoh hynne ka sngi ka 3 tarik Naiwieng u la leit ban jurip ïa ki jaka na bynta ka jingpynkhreh ïa ka 2nd North East Olympic Games 2022.
Ha kane ka sngi la ïadon lang u Bah John F Kharshiing Working President Meghalaya State Olympic Association, Shivam Awasthi Director Sports and Youth Affairs, bad u Bah P. B War Nongrbri Assistant Director Sports and Youth Affairs.
Ha ka jingleit jurip une u Myntri ka sorkar jylla bad ki heh ophisar ka sorkar jylla ki la leit ban khmih nyngkong eh ïa ka madan third ground hapoh madan polo ha kaba ki la peit pyrman ban khmih ïa ka jingpynkhreh ïa ki kam ki jam na bynta kane ka lympung ïalehkai kaba heh ka ban sa long shen hapoh ka jylla.
U myntri ha kane sngi u la khmih ïa ki jingshna kiba dang ïaid shaid shaid hapoh madan polo ha kane ka madan ha kaba lah ïohi ruh ïa ka jingpynieng ïa ki jaka shong kiba shipor kiba dang shna, ka jingsiang cement ïa ki madan harud jong ka madan bad ka jingshna pynbha ïa ki jaka khreh jaka khrum jong ki nongïalehkai phutbol.
U myntri u la rung ruh sha ka madan ïalehkai tennis kaba dang ïaid ka jingpynieng ïa ki païa na bynta ban shna ïa ka jaka ban pynlong ïa ka jingïalehkai ïalympat (wrestling) bad ka jingïarah nar (weightlifting).
Hadien ka jingleit jurip ha madan Polo u myntri u la hiar sa shapoh ka Sports Authority of India (SAI) Center ha Nehu ha kaba u la leit ban khmih ïa ka jingpynkhreh hapoh kane ka shlem ai jinghikai jong ka SAI bad u la leit ban rung ruh hapoh ka madan ïalehkai siat khnan (Archery) ha kaba u la leit ban ïakren ruh bad ki khynnah kiba dang ïa praktis hapoh kane ka madan bad u la ai mynsiem ruh ïa ki ba kin ïalehkai bha ban pynjop ïa ka jylla.
U Myntri hadien kane u la leit ban rung ruh hapoh ka Indoor hall kaba don hapoh phyllaw jong ka Nehu bad ïa ka madan basketball ka ban long ka jingïalehkai Wushu ha kaba u la leit ban peit ïa ki jingpynkhreh kiba dang ïaid shaid shaid haduh mynta.
U Bah Banteidor Lyngdoh, u la wan shakhmat ban pynpaw ïa ka jingkmen bad ïa ka khmat kaba phuh samrkhie bad ka mynsiem kaba sngewkmen shikatdei eh ba u la ïoh ban leit jngoh hi da lade ïa baroh kine ki jaka ki ban sa long ki jaka ban pynlong ïa ki jing-ïalehkai.
U myntri u la ong ba u la leit ban khmih hi da lade ïa ki kam ki jam namar baum kwah ban don kino kino ki jingduna ha ka jing-pynkhreh na bynta ban pynlong ïa kane ka lympung ïalehkai jong ka 2nd Edition North East Olympic Games ka ban sa sdang naduh ka 10 tarik Naiwieng.
U kyrmen ruh ba kiei kiei baroh ba ki pynkhreh kin long kiba janai bad u ngeit skhem ba ha shuwa katei ka sngi kin lah ban pyndep lut ïa baroh ki kam ha shuwa ka por ba ki la buh.
Na ka ka liang jong u Bah Banteidor u la ai ka jingkitbok kitwriang ïa baroh ki nongïalehkai ki ban mihkhmat ïa ka jylla sha kane ka lympung ïalehkai ba kin ïakhun tyngeh bha ban nym kynran dien ha ki jing-ïalehkai ba ki ïakhun bad u la kyrpad ruh ïa ki nongshong shnong, ki paidbah ban ïamih bad ïawan ai mynsiem ïa la ki nongïalehkai jong ka jylla ha kane ka lympung ba ka jylla ka la ioh ban pdiang bad pyniaid (host) ia kane ka lympung kaba dei ruh ka sien ba nyngkong na ka bynta ka jylla.
