SHILLONG:
Ka Assam ka long ka jylla kaba ka kamai bun eh ki takma ha ka jingïalehkai ïasiat suloi ha ka rynsan jong ka 2nd North East Olympic Games 2022, ha kaba ka la ïoh haduh 11 na ki 18 tylli ki takma ksiar ha kane ka jingïakhun.
Ïa kane ka jingïalehkai la pynlong hapoh Assam Regimental Centre indoor bad outdoor shooting ranges, bad ka la poi noh sha kaba kut mynta ka sngi ka 15 Naiwieng.
Lait na ki 11 tylli ki takma ksiar ba ka la ïoh, ka Assam ka la khur ruh ïa 4 tylli ki takma rupa bad 4 tylli ki takma rnong. Ka Manipur ka la ïoh ban khur ïa ïa ka kyrdan kaba ar ha kaba ka la ïoh 4 tylli ki takma ksiar, 8 tylli ki takla rupa bad 5 tylli ki takma rnong.
Ka Mizoram ka la ïoh 2 tylli ki takma rupa bad 4 tylli ki takma rnong, katba ka Arunachal Pradesh ka khlem la ïoh ban kamai takma ha kane ka jingïalehkai. Katba ka Tripura bad ka Nagaland ki khlem ïashim bynta ha kane ka jingïalehkai ïasiat suloi.
Baroh ki kynhun kiba ïashim bynta ki la phah mar 16 ngut ki nongïalehkai bad tang ka Arunachal Pradesh, kaba la phah tang 11 ngut ki nongïalehkai.
Ka Meghalaya ka la ïoh ban khur 3 tylli ki takma ksiar ha kaba u Dennyson Kyrsian u la jop ha ka thup 50m Rifle Prone Individual, u Banrilang Bleine bad u Rajdeep Ghosh ki la jop ha ka 50m Rifle Prone Men’s Team event; katba ka Anjali Singh, Veronica Buhroy bad ka Amalisha N Sangma ki la jop ha ka 50m Rifle Prone Women’s Team Championship.
