SHILLONG :
Ha ka jingpynlong ïa ka jingïakob ñiah saikil ha ka sngi ba-ar, ka jylla Meghalaya ka la rah ïa ka takma Ksiar, takma Rupa bad ka takma Rnong ha ka jingïakhun jong ka lympung 2nd North East Olympic Games 2022.
Lyngba kane ka jingjop don burom ka la long ka jingsngewsarong ïa ka jylla Meghalaya kaba dei ruh ka jylla kaba pdiang ïa kane ka lympung ha ka sien kaba nyngkong.
Ki nongñiah saikil kiba la jop ha ka thup jong ka jingïalehkai MTB Downhill Hard Tail ki long u Willbornson Wahlang uba la khur ïa ka takma Ksiar, u Amedius Therlang Mar-baniang takma Rupa bad u Nicholas Syrti uba la khur ïa ka takma Rnong.
Katba ka Manipur pat ka la ïoh ïa ka takma Ksiar lyngba u Thokchom Tennyson Singh da ka jinglah ban poi tang 2.08 ha ka jingïakhun jong ka thup MTB Downhill Full Suspension jong ki shynrang, bud pat u Dame Wanki Ha-o Suiam na ka jylla Meghalaya da ka jinglah ban poi ha ka kyrdan ba ar bad duna 7 sekhon na u Thokchom uba la ïoh ïa ka kyrdan ba nyngkong. Bad u nongñiah saikil ka Manipur u Kshetrimayum Jack Singh u la ïoh ïa ka kyrdan ba lai (2.19).
Haba phai pat ha ka jingïakhun jong ki kynthei ha ka thup Open Cross Country race, ka Lindum Iakia naka jylla Arunachal Pradesh ka la ïoh ïa ka takma ksiar da ka jinglah ban poi tang 9 minit 42 sekhon bud pat ka thei jong ka jylla Manipur ka Pangambam Priya Devi (9:43.44) bad ïa kyrdan balai la khur da ka Haomon Urbashi Devi (9:48.10).
Hynnin ka sngi ha ka thup ïalehkai jong ki juniour u AZ Thotmachan naka jylla Manpur u la ïoh ban rah ïa ka takma ksiar ryngkat u Pynshailang Khyllait na kane ka jylla Meghalaya u la ïoh ïaka takma Rupa bad u Vanlalruata jong ka jylla Mizoram uba la ïoh ïa ka takma Rnong.
Ïa kine ki takma la sam mynta hi ka sngi da ka Kong M Ampareen Lyngdoh (MLA) kaba dei ruh ka kongsan ha kane ka sngi.
