SHILLONG:
Lai tylli ki kynhun ki la ïoh ban rung sha ka Semi Final jong kane ka lympung 2nd North East Olympic Games 2022, kata ka Meghalaya, Mizoram bad ka Nagaland hadien ba ki la khur ïa ka jingjop mynta ka sngi ka 9 tarik Naiwieng.
Ha ka jingïalehkai kaba nyngkong ha kane ka sngi, ka Meghalaya ka la pynbam da shiteng dorjon ïa ka Arunachal Pradesh, (da 6-0) ha ka Group 2 ha ka jingïakhun kaba la long hapoh ka madan ïalehkai jong ka MFA Turf, Third Ground, Polo, mynta ka sngi.
Lai tylli ki kol ka Meghalaya ka la thep ha ka kylla step bad lai tylli pat hadien ka la thep ha ka kylla miet jong kane ka jingïalehkai ha kaba u Everbrightson Mylliempdah u la ïoh ban thep ïa ka kol ha ka minit kaba 8, u Figo Syndai u la thep ïa ki kol ha ka minit kaba 39 bad 62 , u Damonlang Pathaw u la thep ïa ka kol ha ka minit kaba 41, u Dajiedlang Wanshnong u la thep ïa ka kol ha ka minit kaba 57 bad bud khatduh pat sa u Nelson Rymbai u ba la thep ïa ka kol ha ka minit kaba 79 jong ka kylla miet.
Ka Arunachal, ka la ïalehkai bha watla ka la shah rem noh ruh hynrei kane ka kynhun ha kane ka sngi ka ka ïai pyrshang ban ïakhun tyngeh ha ha kaba la don ka khep ha kaba u Sangti Janai Shianglong u la ïoh ïa ka bol ban rah shajan ka kol hynrei ki rangapbak ba tbit jong ka Meghalaya ki la ïoh ban knieh noh ïa ka bol na u.
U Wanshong u la ïoh ïa ka kabu ksiar ban thep lyngba ka penalty, hynrei ka bol ka khlem leit rung sha jar namar ka jingtbit u rangapkol uba la kyndat noh sharud bad u Dajiedlang Wanshong u la ïoh biang ïa ka bol sa shisien bad u la thep da kaba suk ïa ka bol.
Haba phai pat ha ka jingïakhun hapdeng ka Mizoram pyrshah ïa ka Assam kala long ka jingïakhun kaba noh shilliang ha kaba ka Mizoram ka la pynjem khnap noh ïa ka Assam kiba don ruh ha ka Group 1 da kaba ka la pynliem noh ïa ka da 6-0, u Joseph Lalvenhima uba la ïoh ïa ka hat-trick ha kane ka sngi uba la thep ïa ki kol ha ka minit kaba 18 (P), 25 bad 37 ha ka kylla step jong kane ka jingïalehkai bad hadien kane u la thep sa ïa kawei ka kol ha ka minit kaba 62 jong ka kylla miet. Ki artylli kiwei ki kol pat ki long kiba ka thep da u K Lalrosanga ha ka minit kaba 47’ bad u Rohlupuia pat uba la thep ïa ka kol ha ka minit kaba 51′ jong ka kylla miet.
Ka Assam ka la shah rem noh ha ka jingïakhun ba nyngkong jong ka pyrshah ïa ka Manipur ha ka sngi nyngkong bad ka la shah pynleit ïing mynta ka kynti. Namar ha ka Group 1 don lai tylli ki kynhun kata ka Mizoram bad Manipur ki la ïoh ïa ka jaka ha ka semi phainal bad mano ban long nyngkong ne ba ar yn sa pynthikna da kine ki kynhun kin sa ïalehkai pyrshah para maki la sngi thohdieng.
Ha ka jingïalehkai kaba khatduh mynta ka sngi ka Nagaland ka la ïoh ïa ka jaka ban rung sha ka semi phainal hadien ba ka la pynliem noh da 4-0 ïa ka Sikkim ha kaba u Yhoto Lohe u la thep ïa ka kol ha ka minit kaba 19, u Thulunso u la thep ïa ka kol ha ka minit kaba 35′ ha ka kylla step, u Hivika u ka thep ïa ka kol ha ka minit kaba 55 bad u Pursunep u la thep ïa ka kol ha ka minit kaba 88 jong kylla ka miet.
Ka Sikkim la shah pynliem noh ha ka Meghalaya da 6-1 ha ka jingïalehkai kaba lah long myn ha ka sngi nyngkong, ka Sikkim ruh ka la ngat lang bad ka Arunachal, hadien ba ka khlem shym la lah ban ïoh rung semi phainal. Tangba kine ki ar kynhun kin sa ïalehkai pyrshah para ma ki na bynta ba kin ïa knieh ïa ka kyrdan kaba lai ha ka Group 2 la sngi thohdieng. Katba ka Meghalaya pat kan sa ïakhun bad ka Mizoram na bynta ka kyrdan ba halor.
Ki jingïalehkai mynta ka sngi ka 10 tarik Naiwieng kan long hapdeng ki thei ïalehkai kiba hapoh k 17 snem (U-17), ha kaba ka Arunachal Pradesh kan sa ïalehkai pyrshah ïa ka Mizoram ha ka Group-2 ha ka por 11baje mynstep, bad ka Sikkim kan sa ïalehkai pyrshah ïa ka Manipur jong ka Group-1 ha ka por 3:30 janmiet.
