SHILLONG:
U myntri rangbah ka jylla u Conrad K. Sangma ha ka jingïadonlang jong u myntri ka sorkar jylla ba dei khmih ïa ka tnad ‘Information Technology and Communication’, u bah Hamletson Dohling, uba dei ruh u MLA jong ka Mylliem konstitwensi, ki la buh ïa u mawnongrim na ka bynta ban shna ïa ka Multipurpose Indoor Stadium ha ka shnong Lawsohtun kaba hap hapoh ka Mylliem konstitwensi.
Ïa kane ka ïing ïalehkai yn shna ha ka jinglut kaba 8 klur tyngka, ha kaba yn bei pisa lyngba ka skhim ‘Khelo India’ bad shiteng yn bei na ka skhim ïalehkai jong ka jylla.
Haba kren ha kane ka jingïalang plie mawnongrim, u Conrad Sangma u la ong ba ka kam ïalehkai bad ki samla, ki dei kiba ka sorkar ka la buh ha khmat, ban pynbit pynbiang bad ban kyntiew ïa ki.
U myntri rangbah u la ong ba ïa kine ki jingtei la tei na ka bynta ki samla donsap ban pyntbit shuh shuh ïa ka sap kaba ki don. U la ong ba kine baroh ki kam pynroi, la lah ban pynurlong ha kine ki saw snem shiteng wat hapdeng ka jingwan lynshop ka khlam Covid -19. U la bynrap shuh shuh da kaba ong ba ka thong jong ka sorkar ka long ban pynmih ïa ki rang ïalehkai, ki ban jop bun ki takma ha ki national level, bad ha ka rynsan Olympic.
U myntri Hamletson Dohling u la ong ba haduh mynta, kumba 60 na ka shispah jong ki nongshong shnong jong ka Mylliem konstitwensi ki dei ki samla. U bah Dohling u la bynrap da kaba ong ba ki samla ki dei ka lawei na ka bynta ka thaiñ bad ka jylla baroh kawei. Na ka liang u Director of Sports and Youth Affairs ka jylla, u Shivansh Awasthi, u la ïathuh ba kane ka Multipurpose Indoor Stadium kaba yn dang shna ha Lawsohtun, kan don ruh ïa ka fitness centre ne ka kamra kilan met, ka kamra ban kylliang jaiñ bad ka ophis treikam. U Awasthi u la ong ba kine ki dei ki sienjam ban pynurlong ïa ka ‘Sports Policy’ kaba lah thaw kyrpang da ka sorkar MDA na ka bynta ban pynkiew ïa ki kam ïalehkai bad ban khring ïa ki samla donsap.
U la ong ba ka tnad ka la ïaid shakhmat bad sdang ban peit bniah ban lap ïa ki rang bad ki thei don sap da ka jingïatreilang bad ka ‘Meghalaya State Olympic Association’, ka Australian Olympian – Ian Campbell, kaba dei ka kynhun na ka ri Australia, kaba wad ïa kiba don sap, bad ka la shem ba don kumba 500 ngut ki nongïalehkai, ha kane ka jylla, kiba naduh ka rta kaba 8 snem haduh 18 snem, ki don ïa ka sap ïalehkai.
“La lap ruh ba don kumba 200 ngut ei ei, ki nongïalehkai ha ka jylla kiba dei na ki karta bapher bapher, kiba don ïa ka met kaba koit ba khiah. Kine ki long kiba biang eh lada ki ïoh ka lad kaba paka bad ka jingkyrshan kaba biang ba kin pyntbit ha ki kam ïalehkai,” la bynrap u Awasthi.
