SHILLONG:
Pynlong ka tnat Sports and Youth Affairs ïa ka jingpynkup burom ïa ki nongïalehkai khun kti jong ka jylla kiba la jop ha Turkey, ha ryngkat ruh ïa ki rang pyni ksah kiba lah jop ha ri Vietnam bad Thailand.
Ha kane ka sngi la wan ban ïadon lang u Conrad K. Sangma Myntri rangbah jong ka jylla kum u kongsan, Metbah Lyngdoh speaker Meghalaya Legislative Assembly kum u Symbud kongsan, Banteidor Lyngdoh Myntri ka tnat Sports and Youth Affairs kum u symbud kongsan, John F Kharshïing President Meghalaya State Olympic Association, Shivansh Awasthi, IAS, Director Sports and Youth Affairs, Paia War Nongbri Assistant Director Sports and Youth Affairs, O. Mawthoh District Sports officer East Khasi Hills District.
Ka sorkar jylla mynta ka sngi ka 26 tarik Risaw ka kah pynkup burom ïa lai ngut ki nongïalehkai khun kti kiba lah jop ha ka 43rd World Arm Wrestling Championship kaba lah long hapoh Antalya Turkey, Raymond Nongkhlaw uba lah jop ha ka PRO AM Universe Championship kaba lah long hapoh Bangkok, Thailand bad ïa u Donbor Rumnong u rang pyni ksah uba la jop ha ka WFF PRO AM Asia Pacific kaba la long ha Ho Chi Minh City, Vietnam.
Ka Meghalaya Arm Wrestling Association ka la pdiang burom ïa ka kynhun naduh na Guwahati Airport ha kaba ka la leit ban shaw ïa kane ka kynhun jong ki nongïakhun kti kiba la wanphai sha la ïing na ka ri Turkey.
Ha kane ka sngi la don ka jingpynkup burom ïa kane ka kynhun ter ter naduh na Nongpoh, lad Umsning, Umsning, hapoh umiam view point bad khatduh eh la pynkut hapoh State Convention Centre ha kaba ka sorkar jylla lyngba ka tnat Sports and Youth Affairs ka la pynkup burom ïa kane ka kynhun bad ïa ki rang pyni ksah kiba dang shu dep ban jop.
Ka Kong Margreth Pathaw kaba na Umsning kaba la jop ïa ka takma ksiar bad takma rupa ha ka kti ka mon bad kti kadiang ha ka kyrdan jong ka 60kg, ka Kong Angel Mary Mylliem Umlong Khun Syiem kaba na Umlyngka kaba la jop ïa ka takma rnong, bad ïa u Bah Alexander Lyngdoh uba na Namdong uba la jop ïa ka takma rnong ha ka thup jong kiba duna ka bor ïohsngew (para hearing impaired).
Ha kane ka sngi pynkup burom ïa kine kiba jop ha ka jingïalehkai khun kti, ka kong Margreth Pathaw kaba la jop ïa ka takma ksiar bad rupa ka la ïoh ïa ka song pisa kaba long 5 lak tyngka, ka kong Angel Mary Mylliem Umlong Khun Syiem kaba ïoh ïa ka takma rnong ka lah ïoh ïa ka song pisa kaba long 1 lak tyngka bad u Bah Alexander Lyngdoh uba jop ïa ka takma rnong u lah ïoh ïa ka song pisa kaba long 1 lak tyngka.
Ki rang kynsai ba pyni ksah kiba la shah pynkup burom bad ïoh ïa ka khusnam u long u Bah Raymond Nongkhlaw uba la jop ïa ka takma rupa ha ka PRO AM Universe Championship kaba la long hapoh Bangkok, Thailand u la ïoh ïa ka song pisa kaba long 1 lak tyngka bad u Bah Donbor Rumnong u rang pyni ksah uba la jop ha ka WFF PRO AM Asia Pacific kaba la long ha Ho Chi Minh City, Vietnam u la ïoh ïa ka song pisa kaba long 50hajar tyngka.
U Bah Banteidor ha ka jingkren u la ai ka jingïaroh ïa kine ki kynhun ba ka jingjop jong ki ka la wanrah ïa ka nam ka burom ïa ka jylla, ha ka por kaba lyngkot bha u Bah Banteidor bad ka tnat sports u la ong ba ki la pynbeit ïa kane ka prokram na bynta ban pdiang burom ïa kine ki kynhun, u la ong ruh ba ka long ka jingsarong kaba khraw ïa ka jylla bad ïa u ruh kumjuh.
U la ong ruh ba ha ka por ba u la shimti ïa ka kam kum u myntri ba khmih ïa ka tnat Sports u la ïakren bad u Myntri Rangbah ka jylla ban shna noh la ka jong ka sport policy bad dei lyngba kane ka sport policy ba ka sorkar mynta ka sa lah ban sdang ïa kane ka jingai khusnam bad ban pynkup burom ïa ki nongïalehkai sports kiba la ïoh ïa ka jingjop.
