SHILLONG:
Ka kynhun ïalehkai kriket jong ka jylla ka la pynkut noh ïa ka jingïalehkai ha ka lympung jong ka Vijay Hazare Tropy kaba la pynlong ha Kolkata mynta ka sngi da jingjop da 59 ron ïa ka Sikkim ryngkat ka jingkyrshan ba radbah jong u Sylvester Mylliempdah uba dei ruh u rangtied bad bol jong ka kynhun.
Ka Meghalaya ka don ha ka Group B ha ka jingïakhun jong kane ka lympung bad ki la shahrem noh ha baroh ki jingïakhun hynrei ha kane ka jingïakhun pyrshah ïa ka Sikkim na ka liang jong ki nongïalam ki la ong ba kadei ka bok.
Ha kane ka jingïalehkai ka Meghalaya ka la jop ïa ka toss bad ka la jied ban tied nyngkong, kaba dei ruh ka jingïakhun ha madan Eden Gardens kaba don ha Kolkata. Ka kynhun jong ka jylla ki la ïoh ban buh ïa ka ron kaba biang kata da 226 ron na ki 50 ober katba ka Sikkim ka la ïoh tang 167 ron.
U Mylliempdah uba la tied nyngkong u la ïoh 49 ron kynthup ruh 5 tylli ki 4 ron, hynrei kaba sngewsih ka long u khlem ïoh shuh ban lehkmen namar ka jingout noh shwa ban ïoh 50 ron (half century).
Kiwei pat kiba la kyrshan lang na ka bynta ka jyla ki long u Lerry Sangma uba la ïoh 45 na ki 47 bol kynthup 4 tylli ki 4 ron bad kawei ka 6 ron, u Yogesh Tiwari (27), bad u Junjun Sangma 18 ron.
U Mylliempdah u la lah ban ban bol bha da ka jingïoh 3/37 katba u Kumar u la ïoh 2/21, u Dippu Ch Sangma 2/33, u Chengkam Sangma 1/6 Rajesh Bishnoi 1/33 bad u Chirag Khurana 1/35
Ka kynhun ïalehkai kriket jong ka Meghalaya kaba dei ruh ka thup jong ki Senior ki dang pynkhreh mynta na ka bynta lympung Ranji Trophy kaba dei ruh kawei na ki lympung kaba heh ba yn sa sdang ha une u bnai Nohphrah 2022.
