SHILLONG:
Ka kynhun ïalehkai phutbol jong ka Meghalaya ka la pynkut ïa ka jingïalehkai da kaba don ha khliehduh jong ka Group 2 ha ka thup jong ki khynnah shynrang kiba hapoh 21 snem (U-21 men’s phutbol) bad kan sa ïalehkai pyrshah ïa ka Manipur ha ka jingïalehkai semi phainal la sngi u Blei.
Katba ka Mizoram ka la pynliem noh ïa ka Manipur da 1-0 mynta ka janmiet ha ka jingïalehkai kaba la long hapoh ka madan jong ka MFA Turf Polo Ground ha ka jingïakhun ban knieh ïa ka kyrdan ba halor duh jong ka Group 1. Ha kane ka jingïalehkai kaba kine ki ar kynhun ha kane ka sngi ki la ïakhun tyngeh ha ki 90 minit jong ka jingïalehkai, u rangïalehkai jong ka Mizoram u Rohlupuia u la ïoh ban thep ïa ka kol ha ka minit kaba 50 jong ka kylla miet ha khmat jong ki spah ngut ki paidbah kiba Ieid phutbol kiba la ïa Risa narud jong kane ka madan ïalehkai. Ka Mizoram mynta kan sa ïalehkai pyrshah ïa ka Nagaland ha ka jingïakhun kaba nyngkong eh jong ka semifinal.
Ka Nagaland kaba la shah pynliem noh ha ka Meghalaya da 2-1 ha ka jingïalehkai kaba la long hynne ka sngi. U Wadajied Kynsai Ryngkhlem u la ïoh ïa ka nam man of th Match ha kaba u la ïoh ban thep ïa ka kol ha ka minit kaba 29 ha shuwa ba u Everbrightson Mylliempdah un thep sa shi kol na bynta ka Meghalaya ha ka minit kaba 62 jong ka kylla miet. Ka Nagaland ka la ïoh ïa ka lad ban pynphai ïa ka kol ha shuwa ban kut artad ka jingïalehkai ha kane ka sngi ha ka minit kaba 88 jong ka kylla miet bad la sakhi ba ka Meghalaya ka la pynsyrwa kai ïa ka por haduh ban da kut ka por ïalehkai bad rah syndon ïa ka jingjop ha kane ka jingïakhun.
Kine baroh saw kynhun ki la ïoh ban rung lypa sha ka jingïalehkai semi phainal hynrei ha ka miej ïakheiñ poiñ jong ka group pat la pynthikna da kine ki jingïakhun kiba la long mynta ka sngi mano ban don halor duh jong ka group.
Ka Mizoram kan sa ïalehkai pyrshah ïa ka Nagaland ha ka jingïalehkai semi phainal kaba nyngkong eh ha ka por 11 baje mynstep la sngi u Blei, bad bud pat sa ka Meghalaya ka ban ïalehkai pyrshah ïa ka Manipur ha ka por 4:30 janmiet hapoh ka jingshai jong ki flood light kiba tbeh jingshai ïa ka madan. Ki briew kiba kwah ban wan peitkai ïa kane ka jingïalehkai ka long khlem jingsiew (free) tangba kat kiba wan kloi ki lah ban rung katba dang don ki jaka shong.
Ka Sikkim kaba la ïoh ïa ka kyrdan kaba lai ha ka Group-2 ha ka jingïalehkai kaba i shongkun bha ha kaba ka la pynliem noh ïa ka Arunachal Pradesh da 5-3 kol.
Ka Arunachal ha ka jingïalehkai pyrshah ïa ka Sikkim ka la ïoh ban thep ïa ki lai kol lyngba u Pungte Lapung uba la thep ïa ka kol ha ka minit kaba 1 mar syn sdang ka jingïalehkai bad ha ka minit kaba 23′, bad u Bengia Bosco uba la thep ïa ka kol ha ka minit kaba 68, katba ka Sikkim pat ka la ïoh ban pynphai ïa ka kol ha ka jingïalehkai kaba da i shongkun shisha ban peit ha kaba ka lah ïoh ban thep ïa ki san kol lyngba u Sahil Chettry uba la thep ïa ka kol ha ka minit kaba 10, u Rohit Gurung u la thep ïa ka kol ha ka minit kaba 42, u Pravin Rai u la thep ïa ka kol ha ka minit kaba 82 bad u Crisnawag Sherpa uba la thep ïa ka kol ha ka minit kaba 86, bad 90.
Mynta ka sngi saitjain pat yn sa sakhi ïa ka jingïalehkai kaba khatduh eh jong ki group stage jong ki khynnah kynthei kiba hapoh 17 snem (U-17 women), ha kaba ka Meghalaya kan sa ïalehkai pyrshah ïa ka Arunachal ha ka Group-2 ha ka por 11 baje mynstep bad bud pat sa ka Sikkim ka ban ïalehkai pyrshah ïa ka Assam ha ka por 3:30pm janmiet ha ka Group-1.
