NONGSTOIN
Ka Ri Bhoi United FC ka la pynliem noh ïa ka Naco Imphal da 2-1 ha ka lympung kynjatbol kaba heh jong ka New Nongstoiñ Sport Social & Cultural Club (NNSSCC). Kane ka lympung kadei ruh kawei na ki lympung baheh tam ha kane ka jylla ha kaba ki klob kiba paw ha India kin wan ban shim bynta kynthup ïa ka Mawlai kaba dei ka lahduh jong ka Shillong Premier League.
Ïa kane ka lympung ïalehkai phutbol la tip ruh kum ka Invitation Knock-out Football Tournament 2022-23 bala pynlong bad pynïaid da ka New Nongstoiñ Sport Social & Cultural Club (NNSSCC) yn pynlong ha ka madan ïalehkai phutbol kaba don hapoh ka New Nongstoiñ.
Kane ka lympung ïalehkai jong ka Invitation Knockout Football Tour-nament 2022-23 ka don ïa ka khusnam pisa kaba heh bha kaba la kot haduh ka 10 lak tyngka ryngkat ki trophi.
Ka kynhun ïalehkai kaba ïoh ban rah ïa ka nam lahduh ha kane ka lympung ïalehkai kin ïoh ban rah ïa ka song pisa kaba long haduh 7 lak ryngkat, bad ka kynhun ïalehkai kaba wan ba ar (runners up) kan ïoh ban rah ïa ka song pisa kaba long haduh 3 lak tyngka.
Ki kynhun ïalehkai phutbol kiba la wan shim bynta ha kane ka lympung ïalehkai ki don haduh 16 tylli ki kynhun kiba napoh bad nabar ka jylla ruh, kynthup ïa ka United SC Kolkata, PSA Guwahati, Assam Rifle, Himalaya Sporting Club Sikkim, Naco Imphal, Guwahati Town Cub, ka ASEB Football Team Assam, MLP FT, Golden Lion FC Rymbai, PFR Academy, Khliehmawlieh VC, Ri Bhoi United FC, Kith United FC, Assam Regiment, Mawlai Football Club Shillong bad ka Shillong Lajong Football Club.
Ha kane ka jingïakhun ka Imphal ka la ïoh ban pynkhih jar nyngkong ha ka minit ba 4, hynrei ka Ri Bhoi United ka la ïoh ban pynphai noh ïa kane ka kol ha ka minit ba 48 lyngba ka jingshut free kick jong u Rustom Khriam. Ka jingïakhun ka la kham khluit hadien ba ka jingïalehkai ka la ïakhaid da ka jingïoh da 1-1 hynrei ka Ri Bhoi ka la shim shuh shuh ïa ki kabu bad ki la ïoh ban thep biang ha ka minit ba 60 lyngba u Robert Khongjoh. Haduh ban da kut ka minit ïalehkai ka Imphal ka khlem ïoh shuh ban thep kol watla ka la pyrshang katba lah ban khur ïa ka jingjop ha kane ka sngi.
Ïa ka nam Man of the Match la rah da u Rustom Khriam (Ri Bhoi United).
Shuh shuh ha katei ka sngi katei ka lympung ïalehkai kum ka dak jong ka jingsngew lem ïa ka jingjia ha Mukroh,West Jaintia, ha shuwa ban sdang ka jingïalehkai baroh ar tylli ki kynhun ha Ryngkat ki paidbah kiba wan ban sakhi ïa katei ka lympung ki la pynlong ïa ka jingsngap jar kaba shi minit.
