TURA:
Ka jingïakop siat khnam jong ka 5th Meghalaya Games kaba la poi sha kaba kut ha ka 20 tarik u Kyllalyngkot 2024 hynne ka sngi ha Monfort Centre for Education School, Danakgre, Tura
Ha ka jingïakhun final jong ka Indian Round (Team Event) ki kynthei, ka West Khasi Hills District ka la khur ïa ka takma ksiar hadien ba ka la jop ïa ka East Khasi Hills.
Ha ka Indian Round (Team Event) ki shynrang, ka South West Khasi Hills District ka la lah ba kan khur ïa ka takma ksiar hadien ba ka la lah ban pynliem noh ïa ka East Khasi Hills.
Ha ka Recurve Mixed Team, iïa ka takma ksiar la khur da ka West Jaintia Hills hadien ba ka la jop ïa ka South West Khasi Hills, kaba la khur ïa ka takma rupa.
Kumjuh ha ka Indian Round Mixed Team, ka East Khasi Hills District ka la lah ban khur ïa ka takma ksiar hadien ba ka la jop ïa ka Eastern West Khasi Hills District.
Ha kine ki jingïakhun final la wan sakhi lang da u Myntri Rangbah ka Jylla u Conrad K. Sangma, kumjuh u Myntri ka tnat Sports & Youth Affairs u Bah Shakliar Warjri, u MLA ka Jowai Constituency u Bah Wailadmiki Shylla, u Chief Secretary ka Jylla u Bah D.P Wahlang, u DGP ka Jylla u Dr. LR Bishnoi, ki dkhot ka Archery Association of Meghalaya bad kiwei kiwei.
