NONGPOH:
Ka Ri-Bhoi United Football Club, ka la ïoh ban rah ïa ka namlahduh, ha ka lympung ïalehkai phutbol kaba la pynlong da ka Nongpoh Sports Association (NSA), kata hadien ba ka la lah ban pynliem noh pyrshah ïa ka Blue Bombers FC ha ka jingïakhun phainal kaba la long mynta ka sngi ha Madan NSCA Pahamsyiem.
Khyndiat haba phai sha katei ka jingïakhun phainal, ka la long ba baroh ki ar kylla jong ka jingïakhun, ki la kut noh ha ka jingïakhaid kaba ym don kiba ïoh pynkhih jar, kumta na ka bynta ban rai ia ka namjop-namrem, ki nongpynïaid ki la rah noh sha ka Tie Breaker bad dei hangtei ba ka Ri Bhoi United FC ka la lah ban pynliem noh ïa ka Blue Bombers FC.
Haba phai sha ki khusnam, ka Ri Bhoi United FC kaba la ïoh ban rah ïa ka namlahduh, ka la ïoh ban khur ia ka song pisa kaba T. 1 lak lem bad ka trophy bad ka Blue Bombers FC kaba la rem haka jingïakhun phainal haka khur ïa ka song pisa kaba long T. 50 hajar lem bad ka trophy.
Kiba la sakhi lang ha katei ka sngi ïakhun phainal, ki kynthup ïa u Bah Mayralborn Syiem MLA ka Nongpoh kum u kongsan, u Bah Aibor Khongjee uwei na ki rangïalehkai ba paw ka Jylla kum u symbud kongsan, nangta u Bah Balajied Ranee MDC ka Nongpoh, ki heh nongïalam seng na Ri Bhoi lem bad shibun kiwei.
