SHILLONG:
Kumba 167 ngut ki rangbiria na kylleng sawdong ka bri Hynniewtrep bad kumba 91 tylli ki kynhun, ki la hiar sha madan Second Ground Polo, ban ïashim bynta shitrhem sha ka Rong Biria Seng Kut Snem, ba la pynlong ïa ka da ka Rongbiria Committee ka Seng Khasi Kmie, Shillong.
Ïa kane ka jingïakob ka Seng Khasi ha ki ar snem kiba la dep, kam shym la lah satia ban pynlong ïaka hadien ba ka la don ka jingpyrkhing na ki bor synshar namar ka jingwan ban lyngshop ka jingpang ïabit ka Covid-19, namar ka ba la pynsangeh ïa ka ar snem kynthih, da kumta, myn ha ka 13 tarik Naiwieng 2022, ka madan Polo, ka la sawa jam da ka jingïarisa ïa kynhoi na ki rangbiria bad kumjuh na ki paid nongwan ban peitkai ryngkat ka jingriew jong ka ksiang ka bom ka nakra bad ka phawar na ki rangbiria ba la khur ïa ka nam lahduh.
Haba phai sha ka ïakob siat kaba para marwei, u lahduh dei u Nahsingh Khongsngi na Mawkynieng bad ba wan ba-ar dei u Hed Nongrum na Diengsong bad ïa ka kyrdan balai la rah da u Trilian Warjri na Mylliem Mawkhar.
Haba phai pat sha ka ïakob siat kynhun, ka kynhun ba la rah ïa ka nam lahduh dei Umkdait A ba la mihkhmat da u Olik Jyrwa bad u Wedhsai Kharshiing, ka kynhun ba wan ba-ar pat dei ka Laitkyrhong B ba la mihkhmat da Shailangstar Khongsngi bad Teibor Warbah, ka kynhun kaba wan ba-lai dei Umtyngew C ba la mihkhmat da u u Bah Ryngkatborlang Kurkalang bad u Bah B Rynjah bad kumjuh ka Sohra-Rim A ba la mihkhmat da u Bah Bhakupar Syiemlieh bad u Bah Koswell Syiemlieh, ha kaba la sam artad ïa u Namtam, ki Stien Khun bad kumjuh ka song pisa.
U Rangbah Don Kupar Dkhar President Seng Khasi Kmie, u la kyntiew ïa ka lama jong ka seng khasi shwa ban sdang ka Rongbiria Seng Kut Snem 2022, ha kaba la ïoh ruh ïa ka nguh ka dem ba la ai da u Chairman ka komiti U Tymmen U San ka Seng Khasi Kmie u Rgh Skor Jala.
Ha ka por janmiet la wan ban ïadon lang da u Acting Syiem ka Hima Khyrim u Pa’iem Ainam Manik Syiem, Syiem ka Hima Mylliem, bad synran lang da u President bad General Secretary Seng Khasi Kmie u Rgh D.K Dkhar bad u Hainess Marbaning, ki dkhot jong ka Seng Kynthei, bud pat sa u paidbah nongwan khmih kai bad ba la ïoh ruh ïa ka sur phawar ba la ai da ka kynhun na Tbian Ki Sur Hara.
