NONGPOH:
Ka Pahamrioh Football Club, ka la ïoh ban rung sha ka phainal ha ka lympung ïalehkai phutbol kaba la tip kum ka 1st Damanbait Lamare Knockout Football Tournament, ha madan Umroi Nongrah, kata hadien ba ka la lah ban pynliem noh pyrshah ia ka Oste Phi Oiñ Football Club ha ka jingïakhun semi final kaba la poi sha ka jingïashut Tie Breaker.
Haba phai ha ka kylla step jong katei ka jingïakhun, ka long ba ka Pahamrioh FC ka la lah ban lamkhmat ïa ka jingïakhun da kaba ïoh thep shi kol bad kaba neh haduh ba kut ka kylla step.
Haba bteng ka kylla miet, ka jingïakhun ka la nangshongshit eh, namar ki rangïalehkai ki la lahkai bha, khamtam eh ban ïohkhur namjop bad ban pynthikna ïalade ban rung sha ka Phainal ha katei ka lympung ïalehkai.
Katba ka jingïakhun ka la jam sha ki bynta ba la jan kut jong ka jingïakhun, uwei na ki rangialehkai ka Oste Phi Oiñ FC, u la ïoh ïa ka kabu kaba biang ban pynkhihjar bad ban pynïakhaid ia katei ka jingïakhun.
Haba ka jingïakhun ka la kut noh ha ka jingïakhaid, ki nongpynïaid jong katei ka jingïalehkai, ki la rah noh sha ka jingïashut Tie Breaker bad dei ha ka Tie Breaker, ka Pahamrioh FC ka la lah ban pynliem noh pyrshah ïa ka Oste Phi Oiñ FC bad ban pynthikna ïalade ban rung sha ka phainal ha katei ka lympung.
Lah ruh ban kdew hangne, ka ka kynhun ka ban ïohrah ïa ka nam lahduh ha katei ka lympung, kan khung ïa ka song pisa kaba T. 3 lak bad kaba wan ha ka kyrdan ba-ar kan ïoh ban khur ïa ka song pisa kaba T. 1 lak lem bad kiwei ki khusnam.
