Mawkyrwat:
Ka Wahkaji Sports and Cultural Club ka la ïoh ban rung nyngkong sha ka phainal ban ïaknieh ïa ka nam lahduh jong ka lympung 2nd Invitation Tournament ba la pynlong da ka Ïatyllilang Sports & Culture ha Umdohlun South West Khasi Hills District.
Ha kane ka sngi ka Wahkaji ka la pynliem noh ïa ka 9 Brothers (Tynniaw) da 3-2 bad lah ban ong ruh ba kane ka jingïakhun ha kane ka sngi ka dei kawei na ki jingïalehkai ba kham itynnad ha kane ka lympung baroh kawei.
Ka Wahkaji ka dang ap mynta sa ïa ka rai ka jong kawei pat ka kynhun ban ïakhun phainal kaba yn sa ïakhun ha kane ka taiew ban wan kata ha ka 1 Rymphang, kaba dei ruh ka sngi ïew Umdohlun.
Watla ka 9 Brothers kadei kawei na ki kynhun kaba tbit ha kane ka lympung, hynrei ka jingtbit jong ki rangïalehkai ka Wahkaji ka la pynlong ïa kane ka kynhun ban duh buit noh naduh ka kylla step.
Ka Wahkaji ka la ïoh ban pynkhih jar nyngkong lyngba u Kynsai Thongni (jersey no 3) tang ha ka minit ba 10 hynrei ka kynhun ïalehkai jong ka 9 Brothers ka khlem pynpaw ïa ka jingrandien bad ki la ïakhun tyngeh ban ïoh pynphai ïa kane ka kol hynrei haduh ban kut ka kylla step ki khlem ïoh ïa ki lad ba biang ban ïoh pynkhih jar.
Haba bteng pat ka kylla miet, ka Wahkaji ka la ïoh biang sa 1kol lyngba u Skhemborlang Thongni (jersey no 15) ha ka minit ba 65 bad la sakhi ïa ka jingrisa jong ki paid nongkyrshan kiba la shadkmen bad ai mynsiem ïa ki rangïalehkai ka Wahkaji.
Ka jingïalehkai ka la kham khluit hadien ba ka Wahkaji ka la ïoh bïang ïa kane ka kol bad ka jingïakhun ruh ka la nang kham itynnad bad dei ha ka minit ba 70 ba u Pynskhem Langrin (Wahkaji) u la kum thep hi ïa ka kol (own goal) da ka jingbakla hynrei kane ka khlem pynduh mynsiem ïa ki rangïalehkai ka Wahkaji bad ki la khylli bad pynphai pat da ka kol jong u Bapherbak Nonglang (jersey no 7) ha ka minit ba 75 kaba dei ruh ka kol kaba 3.
Ka 9 Brothers ruh ka khlem aili bad ki la ïai ïakhun da ka jingkyrmen ban ïoh rung sha ka phainal bad tang hadien 5 minit ba la ïoh ïa ka kol ba nyngkong ba la kum thep da u Pynskhem ki la ïoh ban thep pat sa 1kol lyngba u B. Myrthong. Hynrei haduh ban da kut ka minit ïalehkai ki khlem ïoh shuh ban pynphai ïa kol ba ka Wahkaji ka la buh.
Lyngba ki 3kol ka Wahkaji kan sa ïakhun ïa ka phainal ha kane ka lympung 2nd Invitation Tournament ha Umdohlun hynrei ïa ka tarik ban ïakhun phainal na ka liang ka seng kam pat shym la pyntip.
