MAWKYRWAT:
Ka Thaiñ Ban Kyntiew Youth and Social Welfare Organisation (TBKY&SWO) ha ka 5 tarik u Naiwieng, 2022 ka la ïoh ban sdang biang ïa ka lympung ïalehkai kaba la tip kum ka VII Invitation Football Tournament 2022 ha madan Ersaikohpoi, Ngunraw, South West Khasi Hills District ha kaba u Martin M. Danggo uba long u nongmihkhmat barim jong ka Ranikor Constituency u la long u kongsan.
Ha kane ka sngi plie pyrda la ïoh ban ïalehkai sdang da ka Chi-ïong-mut Football Club bad ka Thangbyrniang Football Club, wat lada ha ka madan kaba dang long khoh ruh khohram hynrei ki ‘rangïalehkai ki la pyni shisha ïa ka jinglah jong ki ban ïa pashad bol bad kaba la pyni-itynnad ruh na ka bynta ki nongpeitkai. Hapdeng jong ka jing-ïalehkai naduh ba sdang haduh ba kut ka Chi-ïong-mut FC ka la ïoh ban pynliem noh da 7 – 1 kol pyrshah ïa ka Thang-byrniang FC.
U Martin M. Danggo uba long u nongmihkhmat barim jong ka Ranikor Constituency haba kren kum u kongsan ha ka jingïalang ba lyngkot u la ai mynsiem ruh na ka bynta baroh ki kynhun kiba la wan ban ïashimbynta ha kane ka VII Invitation Football Tournament 2022 ba kin sa ïalehkai bha bad ïaleh da ka mynsiem jong ka jingtreishitom khnang ba kin ïoh ban poi sha ka thong jong ka jingjop.
Kiwei pat kiba ïadonlang ki long u Bah Kitborlang Nongrem kum u symbud kongsan, u Bah Manstudy Nongrem lem bad kiwei de ki ‘riew rangbah jong ka dong ka thaiñ kiba la shah khot sngewbha.
La pynshit pyn-shngaiñ ïa kane ka lympung lyngba ki jingpynbyrngia na ka PHL Group na shnong Mawten, South West Khasi Hills District bad na ka kynhun Black Pink na Rangjadong.
