SHILLONG:
Ka Meghalaya ka la sdang ïa ka lympung ïalehkai 2nd North East Olympic Games da ka jingïalehkai phutbol ha kaba ka la pynliem noh ïa ka 6-1 kol da ki kynhun ïalehkai jong ki khynnah shynrang kiba hapoh 21 snem (U-21 men) ka jylla kaba la long hapoh madan ïalehkai MFA Turf, Third Ground, Polo mynta ka sngi ka 7 tarik Naiwieng.
U samla Dajiedlang Wanshnong u la ïoh ïa ka hat-trick ha kane ka jingïakhun ha kaba u lah thep ïa ki lai kol na bynta ka Meghalaya ha ka minit 23′, 32′, bad 53 minit. Katba u Wadajied Kynsai Ryngkhlem u la ïoh ban thep ïa ki ar kol ha ka minit kaba 90’+3 bad 90’+4 bad bud sa u Oresterwell Langshiang uba la thep ïa ka kol ha ka minit kaba 90’+5. Ïa ka shi kol ka Sikkim ka la ïoh ban thep lyngba u Swarneem Gurung ha ka minit kaba 66 jong ka kylla miet.
Ha ka jingshisha ïa kane ka lympung 2nd North East Olympic Games 2022 kan plie pyrda la sngi palei ka 10 tarik Naiwieng, hynrei ïa ka jingïalehkai Phutbol pat la sdang kloi namar ba ki nongïalehkai phutbol kin dup ïoh bha ban shong jahthait hapdeng jong ki jingïalehkai.
Kane ka jingïalehkai phutbol kan kut ha ka sngi nyngkong, ha kaba ka Nagaland ka la pynliem noh ïa ka Arunachal Pradesh da 2-0 kol bad ka Manipur ka la pynliem ïa ka Assam da 3-0 kol. Ka Meghalaya bad ka Sikkim ki la ïoh ïa ka lad ban lehkai hapoh ka jingthaba jong ki flood light kiba la pynieng thymmai na bynta ban tbeh jingshai hapoh ka madan ïalehkai jong ka MFA Turf kiba la pynieng kyrpang na bynta kane ka rynsan ïalehkai.
Ki rangïalehkai ïalehkai ruh ki la ïoh ïa ka kabu ha ka ban ïakynduh ïa u Khlur ïalehkai phutbol jong ka ri India uba na kane ka jylla ka jong ngi u Bah Eugeneson Lyngdoh MLA ha shuwa ban sdang ka jingïalehkai bad ki lah ïoh ruh ban kynduh ïa u Myntri Rangbah jong ka jylla u Conrad K Sangma, uba lah ai ruh ïa ka syrnod Man of the Match sha u Wanshnong hadien ba u la ïalehkai bha.
Ka Sikkim ka la ïalehkai bha haba sdang ka jingïakhun bad ka la triang ïa ka Meghalaya hynrei ha ka minit kaba 23 u Figo Syndai u la ïoh ban shut ïa ka bol ha kaba u rangapkol jong ka Sikkim u Sushil Limboo u la kyndat ïa ka bol bad u Wanshnong u la ïoh ïa ka kabu ksiar ban thep da ka khlieh.
Ha shuwa ban kut ka kylla step u Swarneem Gurung u la ïoh ban thep kol hynrei u rangapkol jong ka Meghalaya u Banshanskhem Kharsyntiew u la ïoh ban kyndat noh ïa ka bol sharud.
U Wanshong u la ïoh ban thep sa kawei ka kol ha kaba u la ïoh ruh ïa ka hat-trik hadien ba u la ïoh ban thep ïa ka kol kaba lai hamar syn sdang ka kylla miet ha shuwa ba u Swarneem Gurung un ïoh ban thep ïa ka kol na bynta ka Sikkim, ha kaba ki paidbah kiba la wan kyrshan ki la ïa hylla ban ïa risa kmen.
La ïohi ba ka jingïakhun ha kane ka sngi ba kan kut da 3-1 hynrei ha shuwa ban kut ka por ïalehkai ha ka kylla miet u Wadajied Ryngkhlem u la ïoh ban thep ar kol bad bud sa u Oresterwell Langshiang uba la thep ïa ka shi kol ban long da 6-1 kol.
Lashai ka sngi yn sakhi ïa ka jingïalehkai jong ki khynnah kynthei kiba hapoh 17 snem (U-17) ha kaba ka Manipur kan sa ïalehkai pyrshah ïa ka Assam ha ka por 11 baje mynstep bad ka Mizoram kan sa ïalehkai pyrshah ïa ka Meghalaya ha ka por 3:30 janmiet.
