SHILLONG:
Ka jingïalehkai Judo ruh ka kylla long kawei na ki lympung kaba shongshit bha ha kane ka lympung ïakhun jong ka North East Olympic Games kaba pynlong ha kane ka jylla mynta ka kynti.
Ha ka jingïakhun kaba pynlong ha Indoor Stadium jong ka Laban Sports Club, Shillong ha ka thup kiba hapoh 73 kilo jong ki shynrang ïa ka takma ksiar la ïoh da u Kamdon Boi jong ka Arunachal Pradesh, katba u S Rohit na Manipur u ïohi ïa ka takma rupa bud sa ka takma rnong ba la ïoh da u HC Lalchungnunga ka Mizoram bad Victor Deb jong ka Meghalaya.
Ha ka thup ïalehkai jong ki kynthei ba hapoh 63 kilo, ka Kalpana ka la khur takma ksiar na ka bynta ka Manipur, katba ka Yari Maying na Arunachal Pradesh ka khur takma rupa bud pat sa ka Doli Gogoi jong ka Assam bad Lalnunfeli jong ka Mizoram ïa ka takma rnong.
Ha ka thup kiba shynrang ba palat 73 kilo ka jingkhia, u Venuze Dawhuo u la khur ïa ka takma ksiar na ka bynta ka Nagaland bud sa u Th Athoiba na Manipur ïa ka rupa katba u Lalhrezuala na Mizoram bad Anjalu Basumatary na Assam ki la ïoh ban khur ïa ka takma rnong.
Ha ka thup ki kynthei ba 63 kilo shaneng, ka Manipur ka la khur biang ïa ka takma ksiar lyngba ka Th Gangarani bud sa ka Meghalaya ïa ka takma rupa lyngba ka Radika Boro katba ïaka takma rnong pat la ïoh da ka Lalkimizimi jong ka Mizoram bad Rani Boro jong ka Assam.
