SHILLONG
Ki khynnah jong ka skul H.K. Singh Memorial Secondary School, Jowai kiba la mihkhmat ïa ka jylla Meghalaya sha ka lympung 62nd Subroto Cup 2023 International Football Tournament (U-14 Sub Junior Boys) ki la diaw shibun namar ki la hap ban leit ïing noh na ka jingbym lah ban pynurlong ïa ka jingangnud, kata ban jam sha ka semi phainal jong kane ka lympung. Ryngkat ka jingbynnud bad ka jingjaw ummat ki khynnah ïalehkai jong ka Meghalaya ki la mih noh na madan ha katei ka jingïakhun.
Ha kane ka jingïalehkai quarter phainal pyrshah ïa ka skul Chawngfianga Middle School, Saidan, Kolasib, Mizoram ka Meghalaya ka la liem noh da ka said, kata da 1-0.
Ka jingïalehkai ka long kaba itynnad bad baroh arliang ki la pyni ïa ki sap bad ki jingtbit jong ki hynrei namar ka jingbym ïoh kabu ban pynkhih jar ka Meghalaya ka la duh noh jam sha shiliang jong kane ka lympung kaba heh.
Ka Mizoram ka la ïoh ban thep ïa ka shi kol ha ka minit ba 16 lyngba u Isak. Hooid ka jingïalehkai ka long kaba jwat bad na ka bynta ka Meghalaya ruh ka long kaba la pynduh mynsiem namar tang ha ka kylla step ki la shah thep noh hynrei la katta ruh ki nongïalehkai jong ka skul H.K. Singh ki la ïai ïakhun tyngeh, da ka jingthmu ban ïoh pynphai ïa katei ka shikol hynrei namar ka jingskhem ki nongïalehkai ka Mizoram la pynduh buit noh ïa ka Meghalaya ban thaw lad.
Haba phai sha kiwei pat ka jingïalehkai jong kane ka lympung, ka West Bengal ka la pynliem ïa ka Sikkim da 2-0, ka CISE ka la pynliem ïa ka Kerala da 1-0 bad ka Assam ka la jop kput ïa ka Chandigarh da 9-0.
