SHILLONG
Ka H.K. Singh Memorial Secondary School, Jowai kaba dei ruh ka skul kaba mih khmat ïa ka jylla Meghalaya mynta u snem sha ka lympung 62nd Subroto Cup 2023 International Football Tournament ha ka U-14 Sub Junior Boys ka la ïoh ia ka kabu ban jam sha ka quarter phainal khlem da donkam ban ïalehkai.
Ha ka jingshisha ka Meghalaya ka la dei ban ïakynduh bad ka IPSC hynnin ka sngi hynrei na ki daw ba ki khlem lah ban pyndep ïa ki kyndon ba la buh, kum ïa ka Medical test, kumta ka IPSC ka la dei ka skul kaba 16 mynta u snem ban shah kyntait noh mynta u snem ha kane ka lympung.
Na ka daw ka jingshah weng jong ka IPSC, ka Meghalaya ka la ïoh ban rung quarter final jong kane ka lympung ba la pynlong ha Bengaluru.
Kum ban shu pynkymaw, ki don haduh 15 tylli ki skul kiba la shah weng noh na ka daw ba ki nongïalehkai ki la heh ka ‘rta bad kim ïoh ïa ka medical report.
Ka jingïakhun quarter phainal ha kane ka lympung kan long ha ka 6 tarik mynta u bnai ha kaba ka H.K. Singh Memorial Secondary School, West Jaiñtia Hills, Jowai kan ïakhun pyrshah ïa ka Chawngfianga Middle School, Saidan, Kolasib, Mizoram ha ka por 4 baje janmiet.
