SHILLONG:
Ka Kong Rephica Becky Pde kaba napoh Shillong, Meghalaya bad kaba long ruh ka nongtrei sorkar, kata hapoh ka tnat Excise jong ka sorkar jylla ka la wan ba nyngkong ha ka jingïamareh thong bala pynlong hapoh Arunachal Pradesh. Ka jylla Meghalaya
Ka Kong Rephica ka la leit ban ïashim bynta ha katei ka jingïakhun ba la tip kum ka Ultra Trail kaba la long hapoh Basar (Arunachal Pradesh). Ha kaba ka la mareh ha ka jingmareh kaba long 30km bad ka la wan ha ka kyrdan kaba nyngkong.
Kane ka jingmareh ka long shisha kaba eh ha kaba ki nongmareh ki hap ban ïaid lyngba ki khlaw kiba rben ki lum kiba heh ban kiew bad ban hiar, ki wah ban jam shiliang bad ki madan ba khohruh khohram haduh ban da poi sha ka jaka ba kut kane ka jingmareh.
Kane ka jingmareh ka long kaba eh shisha ha kaba ki nongmareh kin hap ban shah ïa ka jingkhriat jong ka suiñbneng ha kine ki bnai tlang, ha kaba ki nongïashim bynta ki hap ban jam sha shiliang ki wah, ban ïaid lyngba ki jingkieng, ki lum kiba noh bha ban iohi ïa ki jaka kiba itynnad jong ka shnong Basar.
Ka Basar ka don kumba 578m napoh sla duriaw ha kaba kine ki nongïamareh kin hap ban kiew haduh 1500m napoh sla duriaw ha kane ka lynti ïaid jong ki kaba 30km.
Ki nongmareh kiba na kylleng sawdong jong ka ri India ki la wan ban ïashim bynta ha kane ka jingïamareh Ultra Trail kaba la long ha Arunachal Pradesh.
Ha kane ka jingïamareh la wan ban ïadon ryngkat lang da u myntri khynnah ka sorkar kmie uba bat ïa ka tnat Law bad Justice jong ka ri India u Kiren Rijijju bad u Myntri Rangbah jong ka Arunachal Pradesh u Pema Khandu kiba la ïashim bynta lang da kaba ïamareh katto katne meter eiei.
Ka Kong Rephica ka la pyndep ruh ïa ka jingïamareh kaba long 50km ha ka Kalimpong Silk Route kaba long kawei na ki jaka mareh kaba eh bha. Ha kaba ka la sdang ban mareh napoh Arita kaba don sha ka lam mihngi jong ka jylla Sikkim bad ki la hap ban mareh pat shaduh Kalimpong kaba hap hapoh ka jylla West Bengal.
Ka Kong Rephica Becky Pde ka long kawei na ki longkmie kiba la ih bad tbit bha ha ka jingïamareh ha ka ri India bad lyngba kane ka jingjop jong ka la wanrah ïa ka nam ka burom ïa ka jylla baroh kawei.
