TURA:
Na ka sor rit na Upper Wadanang kaba don ha West Garo Hills District la paw pyrthei ka Samla Ringchi K Sangma ka Samla kaba tbit ha ka jingïalehkai ïa lympat ne ka Wrestling. Kane ka Samla ka la pynïasoh bad ka Wrestling Association dang kumba shibnai eiei bad ka dang shu ïoh jinghikai kaba malu mala tang kumba hynriew sngi eiei. Hynrei kane ka Samla kaba dang 19 snem ka rta ka la lah ban pynpaw ïa ka jingtbit jong ka ha kane ka Meghalaya Games kaba san da kaba ka jop ïa takma rupa ha ka Free Style Wrestling.
Ka Ringchi ka dei ka nongïalehkai kaba nyngkong eh na ri Lum Garo kaba ïa khun ha kane ka jait jingïalehkai. Haba kren sha ki lad pathai khubor halor kane ka jingjop jong ka, ka Ringchi ka la ong ba ka dang shu pynïasoh bad ka Meghalaya Wrestling Association dang shen bad ka dang ïoh jinghikai dang hynriew sngi.
“Nga sngewkmen palat namarba nga dei ka kynthei kaba nyngkong eh na Tura ban ïoh ïa ka takma rupa, nga ai khublei ïa ka sorkar Meghalaya kaba la pynlong ïa ka Meghalaya Games hangne ïa kaba nga la ïoh ïa ka lad ban ïa shim bynta lang, nga ai khublei ïa ka sorkar ba ka la lah ban pynbiang ïa ka bam ka dih kaba biang bad ka jaka sah kaba paka,” ong ka Ringchi.
Ka jingjop jong ka Ringchi ha kane ka Meghalaya Games ka dei ka jingaimynsiem ïa ki nongialehkai Wrestling ha West Garo Hills bad ka ri Lum Garo baroh kawei bad kane ka jingjop jong ka kan nang pynshlur shuh shuh ïa kiwei pat ki nongïalehkai Sports ha ka jylla.”
