JOWAI
Ka jingïalehkai Phutbol semi phainal kaba ar jong ka Open to all Knockout Football Tournaments 2022 kaba la pynlong bad pynïaid da ka West Jaintia District Sports Association kaba la long mynta ka sngi ha ka jingïalehkai hapdeng ka P.H.E pyrshah ïa ka Seinpynbhalang Sahsniang ha ka jingïakhun kaba la long hapoh Kiang Nangbah Stadium.
Ha kane ka jingïalehkai ka P.H.E ka la pynliem noh ïa ka Seinpynbhalang Sahsniang da 7-0 ha ka jingïakhun jong ka Open to all Knockout Football Tournaments 2022.
Ki rangïalehkai jong ka P.H.E kiba la thep ïa ki hynñiew kol ki long u Promise Kamat uba la ïoh ïa ka hat-trick ha kane ka sngi uba la thep ïa ka kol ha ka minit kaba 3, 45 bad 60, u Tiplang Rasmut u la ïoh ban thep ïa ka kol ha ka minit kaba 13 bad 28, bad u Oshwaki Phawa uba la thep ïa ka kol ha ka minit kaba 62 bad 84 jong ka kylla miet.
Katba ki rangïalehkai jong ka Seinpynbhalang Sahsniang ki khlem lah ban pynphai ïa ka kol ha kane ka jingïalehkai pyrshah ïa ka P.H.E watla ki la pyrshang katba lah ban ïoh pynkhih jar.
Da kane ka jing jop ka P.H.E ka la rung sha ka jingïalehkai phainal jong ka ka Open to all knockout football tournaments 2022.
Ka jingïalehkai phainal kan long hapdeng ka P.H.E pyrshah ïa ka Jarain Football Club ha ka 3 tarik Nohprah por 1 baje nohphai sngi.
