SHILLONG:
Ka Meghalaya Arm Wrestling Association ka la pynbna paidbah ba ka la leit shapoh nongbah Guwahati mynta ka step ha ka ban leit shaw ïa ki nongïalehkai ïakhun kti jong ka jylla kiba la leit ban ïashim bynta sha ka 43rd World Arm Wrestling Championship kaba lah long hapoh Antalya Turkey.
Ka Kong Margreth Pathaw kaba na Umsning kaba la jop ïa ka takma ksiar bad takma rupa ha ka kti ka mon bad kti kadiang ha ka kyrdan jong ka 60kg, ka Kong Angel Mary Mylliem Umlong Khun Syiem kaba na Umlyngka kaba la jop ïa ka takma rnong, bad ïa u Bah Alexander Lyngdoh uba na Namdong uba la jop ïa ka takma rnong ha ka thup jong kiba duna ka bor ïohsngew (para hearing impaired).
Yn sa pynkup burom ruh ïa ki arngut kiwei pat ki nongïalehkai khun kti ka Kong Ribasuk Lyngdoh kaba la jop ha ka jingïalehkai khun kti jong ka Pro Panja League 2020. Bad ïa u Bah Baniaikyrsoi Khongwir uba la jop ïa ka takma ksiar ha ka thup 90kg ha ka All India Fire Service Sports and Fire Meet 2022.
Ka Association kan leit ban pdiang burom ïa baroh ki nongïalehkai ïakhun kti kiba la mihkhmat ïa ka Ri India bad ïa ka jylla kiba la wanrah ïa ka nam ka burom ïa ka jylla bad ïa ka jaidbynriew hi baroh kawei, hadien ba ki la lah ban jop ha ka lympung ïakhun kti kaba la long hapoh ri Turkey.
U Bah Junestar Khar-buli u la pynbna paidbah ban ïamih paidbah ban ïapdiang burom ïa kane ka kynhun ka ban wan poi mynta ka sngi ha kaba nyngkong eh kan leit ban shaw ïa ki napoh airport ha ka por mynstep ha kaba kan pynkup burom shuwa ïa ki ha airport.
Nangta kan sa wan kiew shapoh sor Nongpoh ha kaba kin sa pynkup burom biang ïa ki hangne ha ka por 10baje mynstep. Bad nangne pat kin sa ïaid sha lad Umsning ban pynkup burom ïa ki sa shisien.
Hadien ba kane ka kynhun kan dep ban shah pynkup burom hapoh lad Umsning kan sa rung shapoh shnong Umsning kaba dei ka shnong kaba shong ba sah ka kong Margaret Pathaw ha kaba kin pdiang burom ïa kane ka kynhun hapoh shnong.
Kane ka kynhun kan sa kiew shapoh Umiam view point ha kaba sa kawei ka kynhun ka ban ap ïa ki hangne ka ban pynkup burom ïa ki ha ka por 3baje.
Hadien ba la dep na Umiam view point kane ka kynhun kan sa ïaid lyngba ka sor Shillong bad yn sa pynkut ïa ka jingpynkup burom kaba khatduh bad kaba heh hapoh ka State Convention Centre ha kaba ka tnat Sports and Youth Affairs kan pynkup burom ïa kane ka kynhun ki nongïalehkai ïakhun kti jong ka jylla kiba la wanrah ïa ka nam bad ka burom ïa ka jylla baroh kawei.
