SHILLONG:
Ka tnat Sports and Youth Affairs jong ka sorkar jylla ka la pynbna ba kan pynlong ïa ka jingïamareh marathon hangne hapoh nongbah Shillong ha ka sngi 21 tarik Kyllalyngkot 2023.
Ka jingpynlong jong ka tnat sports and youth affairs ïa kane ka marathon ka long kum shi bynta ban rakhe burom ïa ka jingdap 51 snem jong ka jylla.
Kane ka jingïamareh marathon kaba long 5km bad 10km la ai kyrteng da ka ‘Meghalaya Day Run 2023’.
Ïa kane ka jingïakob mareh kan sdang naduh ka por 7 baje mynstep na ka khyrdop jong ka madan JN Complex Stadium.
Kane ka jingïamareh marathon kan long ha ka kyrdan open category ha ka 10k na bynta ki shynrang bad kynthei kiba la 18 snem shalor bad ha ka 5k yn shah tang ïa ki nongshong shnong jong ka jylla kiba don ha ka rta kaba 14 haduh 18 snem.
Kan don ka jingsam ïa ki khusnam ha ki nongmareh kiba jop ha ka liang jong ka 10k ha kaba ki nongmareh kiba wan ba nyngkong kin ïoh ban rah ïa ka song pisa kaba long 8 hajar tyngka, kiba wan ba ar kin ïoh ban rah ïa ka song pisa kaba long 5 hajar tyngka bad kiba wan ba lai kin ïoh ban rah ïa ka song pisa kaba long 3 hajar tyngka.
Kan don ruh ka jingsam ïa ka consolation prize kaba 1 hajar tyngka ïa ki nongmareh kiba wan ha ka kyrdan kaba saw haduh phra.
Ka khusnam ha ki nongmareh kiba jop ha ka liang jong ka 5k ha kaba ki nongmareh kiba wan ba nyngkong kin ïoh ban rah ïa ka song pisa kaba long 3 hajar tyngka, kiba wan ba ar kin ïoh ban rah ïa ka song pisa kaba long 2 hajar tyngka bad kiba wan ba lai kin ïoh ban rah ïa ka song pisa kaba long 1 hajar tyngka.
Kan don ruh ka jingsam ïa ka consolation prize kaba 500 tyngka ïa ki nongmareh kiba wan ha ka kyrdan kaba saw haduh phra.
Kan don ruh ïa ka jingsam ïa ki cash prize na bynta ki nongmareh kiba ka 50 snem ka ‘rta kiba la wan ha ka top 5 kaba long 1 Hajar tyngka.
Ïa ki chest nombar yn sam ha ka 20 tarik Kyllalyngkot 2023 naduh ka por 10 baje mynstep haduh ka por 4 baje janmiet ha ka ophis jong u District sports office kaba don hapoh JN Complex Stadium, Polo.
Ki nongmareh kiba kwah ban ïashim bynta ha kane ka marathon kin hap ban wanrah lang ruh ïa ka synrod pynshisha kum ka Birth certificate, Epic bad ka aadhar ha ka por ba register ban pynshisha ïa ka snem.
Ïa kane ka jingïakob mareh na ka bynta ka jingïakhun ha ka thup kaba 5k yn sdang na JN stadium Polo (main gate) – Golf club – PTS – Mawroh Shullai Progressive High School – FCI – Meecl – bad kut biang ha JN Stadium (main gate).
Katba ïa ka lynti ïaid na bynta ka10k kan sdang na JN stadium Polo (main gate) – 4th Furlong – Demseiñïong – Nongmensong Junction – BDW School Pynthor – Petals guest house Pynthor – Tiara Restaurant – Golf retreat Golf link – PTS – Mawroh – FCI – Meecl – Forest Colony – bad pynkut biang ha JN Stadium Polo (main gate).
