SHILLONG:
Ka seng Federation of Khasi Jaintia and Garo People (FKJGP) ha ka 21 tarik Nohprah, ka la ai por 10 sngi ïa ka sorkar jylla ba kan weng kam shipor ïa u Director ka tnad Printing Stationery bad Secretary ka sorkar jylla, u Salgira R Marak halor ka jingkynnoh ba u donkti ban pyndonkam bakla ïa ka pisa u paidbah kaba kot sha ka T. 2 klur tam.
Haba kren bad ki lad pathai khubor u Assistant General Secretary ka FKJGP, u bah Reginal Thabah, u la ong ba ha ka 20 tarik Nohprah ka seng ka la dep ban aiti ïa ka shithi sha u Myntri Rangbah ka jylla, u Conrad K Sangma ban dawa ban weng kam shipor ïa u Director ka tnat Printing Stationery bad Secretary ka sorkar jylla hapoh ka 10 sngi.
U Bah Reginal u la kam ba ka seng ka la ïoh ïa ka jingtip kaba thikna ha kaba ïadei bad ka jingpyndonkam bakla ïa ka pisa paidbah da ka ophis ka tnad Printing Stationery bad ïa kane ka jingpyndonkam pisa la lap ruh ha ka kaiphod jong ka CAG, ka pisa ka ba la kot sha ka T.2 klur tam bad ïa kane la lap ruh lyngba ka jingwad RTI da u Bah Eugenestar Kurkalang.
“Ha ka shithi sha u Myntri Rangbah ka jylla, ngi la kdew ïa ka jinglap ba ka don ka jingpyndonkam bakla ïa ka pisa u paidbah bad na ka liang ka sorkar haduh mynta kam shem la leh eiei”, u la ong.
U la bynrap shuh shuh, “Ka seng ka la ai por ïa ka sorkar ban weng kam shipor ïa une u Director hapoh 10 sngi bad lada ka sorkar kam sngap ïa kane ka jingdawa, na ka liang ka seng kan leit khang tala ïa ka ophis treikam jong ka Printing Stationery”.
U Bah Reginal u la kdew ruh ba kane ka jingdawa weng kam shipor ïa u Director ka dei hadien ba ka tnat Printing Stationery kala dep ban thung ïa ka kynhun tohkit (Departmental Proceeding) kaba la khlieh ka Kong Ripnar Lyngdoh, IAS, Commissioner bad kaba la shimti ruh ïa ka jingtohkit da u Dr. Shakil P Ahmet IAS, uba dei ruh u Principal Secretary ka tnad Water Resources.
“Ïa ka jingtohkit la dep ban thung naduh ka 29 tarik u Naitung, bad ka seng ka sngew ba lada ïa ka jingtohkit la thung, kam long kaba dei ba u Director un dang don lang ha kajuh ka tnad’, u la ong.
