SHILLONG:
Ka Myntri kaba dei ban peit ïa ka tnad koit ka khiah ha ka jylla ka Kong Mazel Ampareen Lyngdoh ka la buh ïa ka thong ba 100 sngi ban ïaleh ban kyntiew bad pynbha ïa ka koit ka khiah ha ka jylla Meghalaya.
Haba kren bad ki lad pathai khubor mynta ka sngi, ka Kong Ampareen ka la ong ba kum ka myntri ba dei peit ïa kane ka tnad kan buh ïa ka thong ka ba 100 sngi ba kan kyntiew ïa ka koit ka khiah ha ka jylla khamtam ban tehlakam ïa ka ka jingkhlad ki longkmie ki ba armet, ka jingkhlad ki khyllung ki ba dang shu kha bad ban pynbha ïa ka jaka sumar ïa ka jingpang Cancer ha ka jylla.
“Kum shibynta ban tehlakam ïa ka jingkhlad ki longkmie ki ba armet bad ka jingkhlad ki khyllung ki ba dang shu kha ka tnad kan ïatrei ryngkat bad ki nongïalam shnong bad kiwei ki ba don bynta ban pynthikna ban lah ban weng ïa ka daw ban wanrah ïa kum kine ki jingjia”, ka la ong.
Ka la bynrap “Ha ki snem ba la dep, u Myntri Rangbah u la sdang ïa ka App ka ba la tip kyrteng kum ka “Safe Motherhood” ban pynduna ïa ka jingkhlad ki longkmie ba armet, ki ba la wanrah ïa shibun ki sienjam ban ïoh jingmyntoi, hynrei kane ka dang donkam ka jingïatreilang ban pynthikna ban lah ban wanrah ka jingshngaiñ ïa ki longkmie ha ka por ba ki kha khyllung”.
Ka Myntri ka koit ka khiah ka la ong ruh “Kan don ruh ka jingshimkhia halor ka jingsumar ïa ki khyllung ki ba dang shu kha, da ka jingïatreilang ki Asha, ki nongïalam shnong ban pynthikna ba iwei pa iwei i khyllung in ïoh ïa ka bynta ban ai jingïada”.
“Ngin shim khia bha halor ka jingsumar ïa ki nongpang Cancer ka ba long ka jingpang ka ba la kyrni bha, bad lashai ka sngi ngan leit ban jurip ïa ka Hospital Cancer ha Shillong ban bishar ïa ka jaka sumar na ka bynta ki nongpang Cancer ha ka jylla”.
Kum ka myntri ka koit ka khiah kan shimkhia ruh halor ka Universal Health Scheme ban pynthikna ïa ka jingpyntreikam ka ba dei ban long 100%.
“Ngan shimkhia ruh halor ka jingsumar ïa ka jingpang Tubercolucis, namar kane ruh ka dei ka wei na ki jingpang ki ba la ktah bha ïa ka jylla”, ka la ong.
Ka Kong Ampareen ka la ong ruh ba kum ka Myntri kan shimkhia ruh ban kyntiew ïa ki jaka sumar ha ki kyndong kynshrot. “Ka Sorkar ha kine ki san snem ka la dep ban tei bad pynbha ïa ki jaka sumar ha kylleng ka jylla hynrei ngin dang donkam ban kham trei shitom ban pynthikna ba kan don ka jingkiew ha ka koit ka khiah ha ka jylla”.
“Nga la buh thong na ka bynta 100 sngi ba ngan trei shitom ban wad ïa ki lad ki lynti ba ngan lah ban pynkiew ïa ka tnad koit ka khiah ha ka jylla” ka la ong.
