SHILLONG:
U MLA ka North Shillong u bah Adelbert Nongrum u la ai por ïa ka sorkar 15 sngi ban pynkynriah noh ïa kiba shong ha Them Iew Mawlong bad ban weng noh ïa ka jingkhang ïa ki kali ban ïaid lyngba Them Metor.
Haba ïakren bad ki nongthoh khubor u bah Nongrum u la ong, ” Kato kala biang (Enough is enough), Ka Sorkar ka dei ban shim khia ïa kane ka kam hapoh 15 sngi , namar ngi kwah ban ïohi ïa ki kam ba kin ïaid. Lada kam don ka jingkylla hapoh kine ki 15 sngi ban pynkynriah bad ban weng ïa ka jingkhang ï aka surok kaba ïaid lyngba kane ka jaka, kan pynbor ïa nga ba ngan shim da ki wei ki lynti ki ba ngan sa shim ïa ka rai bad ngan sa pynbna hadien.”
Haba ïadei bad ka Harijan Colony kaba hap hapoh ka North Shillong konstitwensi. U MLA kane ka thaiñ u bah Nongrum u la ong ba ka sorkar jylla ka dei ban ïaid shakhmat ban pynkynriah ïa ki kumba kila thmu, kloi katba lah namar kine ki dei ki nongtrei jong ka sorkar.
U la bynrap da kaba ong, lada ka sorkar ka shim khia, ïa ki nongtrei jong ka dei ban phah sha ki jaka sah kiba la pynkhreh da ka tnat, la ka dei ka ha Shillong Municipal Board (SMB), ne kiwei ki tnat bapher bapher ha Secretariat bad ki wei ki tnat.
Haba ïadei bad kiba wan shong be-aiñ na ka liang u bah Nongrum u la ong ba ka sorkar ka dei ban wat jingtip ban ithuh ïa kine ki briew.
U la ong, ” Kane ka jaka ka hap hapoh ka Konstitwensi jong nga bad kum u MLA ngan buddien ïa kane khlem shongthait. Ngam don kano kano ka jingpyrshah ïa ki. Ka long ka jingleh raiñ ïa ka sorkar jylla kaba khlem lah ban pynbeit ïa kane.Ka sorkar kam kwah ban kynthup lang ïa nga ha ka High Level Committee (HLC) ba ki tieng ïoh ngan tip ïa ka jingthmu barih jong ki. Balei ka sorkar ka suki halor kane bad Balei ka HPC ka pynibor ïa ka sorkar?”
Na ka liang ka jong u bah Nongrum u la ong ba ka dheng kali ka ktah bha ha Nongbah Shillong namar ba la khang ban ïaid kali na kane ka surok bad ïa kane ka jaka la khang mynta palat san snem.
U la bynrap da kaba ong ba ka jingdawa ban pynkynriah ka don namar ki don ki jingjia kiba la pawe ha kane ka jaka bad kum juh ruh haba ïadei bad ka koit ka khiah bad ka khuid ka suba jong kane ka jaka.
Lah ban kdew hangne ba ka Harijan Panchayat Committee (HPC) ka la kyntait ïa ka jingtyrwa jong ka sorkar ban pynkynriah ïa ki 342 tylli ki long ïing jong ka Harijan Colony na Them, Iew Mawlong, sha ka jaka jong jong ka Shillong Municipal Board (SMB).
Haba ïadei bad ka jingïeng skhem jong ka HPC, U Symbud Myntri Rangbah ka jylla u bah Prestone Tynsong u la kren shai ba ka jingpynkynriah ïa ki ba shong basah ha Them Iew Mawlong ka dei ban jia bad ka sorkar kan ïaid sha khmat haba ïadei bad kane.
