SHILLONG:
Ka Voice of People Party (VPP), kan sdang ïa ka jingïakhih naduh ka 17 tarik Jymmang, ban pyrshah ïa ka jingkuman ka sorkar Meghalaya Democratic Alliance (MDA-II) ha ka ba ïadei bad ka jingdawa ban phah pynsangeh ïa ka jingthungkam ha ka jylla.
Katkum ka kyrwoh na u nongaiktien ka VPP u Bah Batskhem Myrboh u la ïathuh ba ka party kan sdang ïa ka jingïakhih jong ka ha ka 17 tarik Jymmang ha jaka ïeng kali jong ka Additional Secretariat.
“Na ka daw ka jingmynthi bad leh bym suidñiew jong ka sorkar MDA 2.0 ba lam khmat da ka NPP ïa ka jingdawa ban pynsangeh ïa ka jingthungkam katba ym pat lah ban bishar bniah ïa ka polisi bhah thungkam bad ka roster system da ka expert committee, ka Party kan pynlong ka jingïakhih da ka ba shu ïa shong ha jaka ïeng kali hajan Additional Secretariat ha ka 17 tarik Jymmang 2023 naduh ka por 10 baje mynstep haduh 4 baje janmiet”, la ong ka kyrwoh.
Na ka liang ka VPP ka khot ka wer ïa baroh ki nongtrei jong ka Party bad ki paidbah ban ïa wan sha ka tei ka prokram jingïakhih ba la pynbeit da ka Party.
“Ngi dei ban kynmaw ba kane ka sorkar lamkhmat da ka NPP ka ïaleh ban leh kyllut ïa ka rukom pyrkhat ba shongnia, ïa ka hok ka sot bad ka ka jingeh jong ki paidbah” la bynrap ka kyrwoh.
Na ka liang ka VPP ka la pyntip ruh nadien kane kan dang bun ki prokram ïa khih kiba ka VPP kan sa pynbna pat kham hadien.
Lah ban kdew hangne ba na ka liang ka VPP ha ka 12 tarik Jymmang ka la leit ban buh da ka shithi sha ka ophis jong u Myntri Rangbah ban dawa ban pynmih da ka notification ban pynsangeh noh ïa ka jingthungkam ha ka jylla, da ka ba aipor 48 kynta.
