SHILLONG:
Ka Myntri jong ka sorkar jylla ka Kong Ampareen Lyngdoh ka la ïathuh ba ki don 242 ngut ki nongshong shnong ka Jylla kiba la wan phai sha ka jylla na Manipur ha kine ki 6 sngi.
Ka la ong ruh ba ka jingsdang ban leit shaw ïa ki ka sdang ha ka 5 tarik bad baroh kine ki 242 ngut, 168 ki dei ki samla pule na RIMS, CAU 57 ngut, 7 na Manipur University, ki don na ka National Sport University, bad ki don ki MBBS, bad ki don ki ba ha ïing jong kine ki samla kiba don shato.
Ka la bynrap da kaba ïathuh ba ki shipai bad ki bor pulit jong ka Manipur ki la long kiba la kloi ban ïarap ïa ki, “Ngi sngew burom shibun ïa ki ba ki la wan sha khmat ban ïarap ïa ki samla pule jong ngi”.
“Ka sorkar kam shym la pynbor ïa ki ban wan phai ïing hynrei ka dei kaba ki kwah ban wan phai, ki don ka jingtieng ba ïoh kim biang shuh ka bam ka dih; bad ki wei, ki ba haïing ki phun ban pynpaw ïa ka jingthrang ban wan ïalam noh ïa kine ki samla,” ka la ïathuh.
Haba ïadei bad ka jinglut jingsep, jong kane ka jingwan ïalam ïa kine ki samla pule ka Kong Ampareen ka la ïathuh ba mynta ki dang peit katno ka lut baroh, namar ka dor jong ka tiket liengsuiñ ka pher na ka wei sha ka wei pat, ka sdang na ka san hajar haduh phra hajar.
“Ngin peit ïa kane ha kine ki khyndiat sngi, namar mynta ka sngi ka dei ka sngi ba khatduh ban leit shaw ïa kiba don ha Manipur,” ka la ïathuh.
Ka Kong Ampareen ka la ïathuh ruh ba ki la pynbiang ym tang ban wan ïalam ïa ki hynrei ki la pynbiang ka bam ka dih bad ban peit ba wat la kim pat don ka tiket hynrei ki la peit ba kin biang ïa ki jingdonkam.
“Ka jingeh ka dei kumno ngin ïoh ban ïakren bad kine ki briew, namar kim don ka Internet ki hap ban shu phun ïa ki, kawei ruh ka jingeh kaba ki ïakynduh ka long kumno ban ïoh ïa pynbiet bad ki shipai kumno kin lah ban synran ïa ki paidbah na ka wei ka jaka sha ka wei pat,” ka la ong.
Ka la bynrap ruh da kaba ong, ka jingeh kaba bud ka dei kumno ban book ïa ki tiket bad ban phah ïa ki tiket number, ban peit ba man la u nongshong shnong kin don ïa u number jong ka tiket namar ki shipai ki la dep kren shai ba kin ym leit shaw lada kim don ïa ka tiket.
