NONGSTOIÑ:
Ka ïing bishar u Special Judge (POCSO), Nongstoiñ kala rai pynrem da ka phah set along haduh 25 snem ryngkat ka kuna kaba T. 50,000 ïa u runar u bala tip kyrteng kum u Bringstarwell Kharbani halor ka jingdonkti jong u ban batbor haduh ban da armet ïa kawei ka khynnah ba dang 13 snem ka rta kaba la jia naduh u snem 2020.
Ka tyllong khubor na ki pulit la ong ba ha ka 23-07-2020, ki pulit ki la ïoh pdiang ïa ka ejahar halor ka jingshah thombor jong katei ka heprit ba dang 13 snem ha kaba ki la register ruh ïa ka mokotduma pyrshah ïa utei u nongkam sniew katkum ka P.S. Case No.31(7)2020 hapoh ka kyndon 5(n)/6 jong ka POCSO Act bad la bynshet ruh ha ka WPSI D. P Nongbri ba kan shimti ban tohkit bniah ïa katei ka kam bad na ka liang jong ki pulit kila pynngat ïa u tei u runar hapoh ka kyndon 506 IPC r/w Section 5(j)(ii)(1)(n)/6 POCSO Act.
Hadien kane, ha ka 11-05-2023, ka Kashari jong u Special Judge (POCSO), Nongstoin haba ai jingithuh ïa ki sakhi ba la ïoh lyngba ka jingtohkit, ka la pynksan ïa ka mokotduma pyrshah ïa utei u runar bad ka la pynngat ïa u ha kitei ki kyndon ba pyrkhing da kaba phah set along haduh 25 snem ryngkat ka kuna ba T. 50,000 na ka bynta ka jingpynkhein kyndon kaba hap hapoh ka kyndon 6 jong ka POCSO Act bad ka kyndon 506 jong ka IPC. Nangta ka Kashari ka la pynngat ruh ïa utei u runar ba un shong along biang sa 1 snem kynthih (simple imprisonment) ryngkat ka kuna ba T.1000/-(Shi hajar).
