NONGSTOIÑ:
Ka ïing bishar u Special Judge (POCSO), West Khasi Hills, ha ka 7 tarik u Lber 2023 kala rai pynrem ïa u wei u briew u bala tip kyrteng kum u Agustine Momin u ba la tip ruh kum Rajesh G. Momin hadien ba ka la lap ba u dei u ba don kti ban leh beijot ïa ka khynnah ba dang hapoh 18 snem.
Ka ïing bishar kala rai ruh ban pynsaja katkum ka kyndon 6 ban set along ïa u tei u briew haduh 25 snem ha ryngkat ka kuna ba u hap ban siew haduh 30 hajar tyngka bad lada um siew ïa kane ka kuna un hap ban bteng biang sa 6 bnai ha along.
Sa kawei pat ka kyndon kaba u tei u briew u la shah pynngat kadei ka kyndon 506 Part II IPC, ha kaba un hap ban shah set along haduh 5 snem ryngkat ka kuna kaba 5 hajar un hap ban siew bad lada um siew un hap ban bteng biang ha along sa 1 bnai.
Ïa u tei u briew ïing bishar kala lap ba u dei u ba don kti an leh beijot ïa ka khynnah kaba dang hapoh ka 18 snem kaba la jia ruh ha kawei na ki shnong jong ka WKHD ha ka 31 tarik u Naitung jong u snem 2020 ha kaba la register ïa ka case hapoh ka Shallang Police Station C/No.9 (07)/2020 Under Section 5(m)/6 of POCSO Act.
Da ka jingtreishitom ka tnad pulit ïa u tei u briew la lah ban kem noh ha ki khyndiat por bala jia katei ka jingjia bad ha ka jingïaid lynti jong ka jingtohkit bniah la lap ba u dei u bala don kti ban leh ïa katei ka kam runar ha kaba na ka liang jong ka ïing bishar kala lah ban ai syndon ïa ka jingbishar kaba hok ïa ka lanot.
