NONGSTOIÑ:
Ka ïing bishar u Special Judge (POCSO), West Khasi Hills, ha ka 23 tarik u Lber 2023 kala rai pynrem ïa u wei u briew u bala tip kyrteng kum u Pateja O Sangma bad uba la ju khot sin ruh kum u Deja hadien ba kala lap ba u dei u ba don kti ban leh beijot ïa ka khynnah ba dang lung ka rta.
Ka ïing bishar ka la rai ruh ban pynsaja katkum ka kyndon 6 ban set along ïa u tei u briew haduh 30 snem ryngkat ka kuna ba u hap ban siew haduh 50 hajar tyngka bad lada um lah ban siew ïa katei ka kuna un hap ban bteng biang sa 6 bnai ha along.
Sa kawei pat ka kyndon kaba u tei u briew u la shah pynngat ka dei ka kyndon 506 Part II IPC, ha kaba un hap ban shah set along haduh 5 snem ryngkat ka kuna kaba 5 hajar tyngka un hap ban siew bad lada um siew un hap ban bteng biang ha along sa 1 bnai.
Ïa u tei u briew ka ïing bishar kala lap ba u dei u ba don kti ban leh beijot ia ka khynnah kaba dang hapoh ka 18 snem kaba la jia ruh ha kawei na ki shnong jong ka WKHD ha ka 1 tarik u Nohprah jong u snem 2019 ha kaba la register ïa ka case hapoh ka Mawshynrut Police Station C/No. 11 (08)/2020 Under Section 5 (j)(ii)(l)(n)/6 of POCSO Act r/w S506 Part II IPC.
Da ka jingtreishitom ka tnad pulit ïa u tei u briew la lah ban kem noh ha ki khyndiat por ba la jia katei ka jingjia bad ha ka jingïaid lynti jong ka jingtohkit bniah la lap ba u dei u ba la donkti ban leh ïa katei ka kam runar ha kaba na ka liang jong ka ïing bishar kala lah ban ai syndon ïa ka jingbishar kaba hok ïa ka lanot.
