SHILLONG:
U Chief Executive Member (CEM) ka Khasi Hills Autonomous District Council (KHADC) u Bah Titosstarwell Chyne, ha ka 23 tarik Lber u la ïathuh ba ka District Council kan sa pan ïa ka jingshai na ka Sorkar jylla, halor ka jingkam ba ka la ïoh ïa ka No-Objection-Certificate (NOC) ban shna lynti rel ha Ri-Bhoi District.
Lah ban kdew hangne ba u Myntri ka tnad Transport u Bah Sniawbhalang Dhar, u la pyntip hapoh ka ïingdorbar ba ka sorkar ka la dep ban ïoh ïa ka NOC na ka KHADC na ka bynta ban shna ïa ka lynti rel na Tetelia sha Byrnihat Ribhoi District.
Haba pynshai, halor kane ka bynta u Bah Chyne u la ong ba ka long ka ba lyngngoh, ba u Myntri ka tnad Transport u la kam ba ka KHADC ka la dep ban ai NOC na ka bynta ban shna ïa ka lynti rel ha Ri-Bhoi District namar ba halor kane kam shem la don kano kano ka record.
“Kane ka project ban shna ïa ka lynti rel ka dei ka ba ki la sdang naduh u snem 1980-81 bad kane ka khubor ka la pynkyndit namar ka Executive Committee kaba nga la ïalam kam pat ai kano kano ka NOC sha ka sorkar ban shna ïa ka lynti rel ha Ri-Bhoi”, u la ong.
U la bynrap shuh shuh,“Ïa kane ka jingpan jingbit na ka District Council ka dang ïaid haduh mynta hynrei ngi la kren shai ba katba ngim pat ïoh ïa ka jingmynjur na ki khlieh nongshynshar ki paidbah ngin ym lah ban ai NOC ban shna ïa ka lynti rel”.
U Bah Chyne u la ong shuh shuh kaba lyngngoh ba ka mih kane ka khubor ha ki lad pathai khubor ba ka sorkar ka la ïoh ïa ka NOC, kumba u la kren hapoh ïingdorbar. “Nga la peit ïa ki file bad ki record halor kane ka jingai NOC hynrei kam don kano kano ka EC ka ba la ai NOC”, u la ong.
“Lehse ha u snem shwa u 2013, ha kato ka por kim pat donkam ïa kano kano ka NOC na ka District Council kumta ki lah ban ïoh ïa ka jaka hynrei naduh ba la pyntreikam ïa ka Land Acquisition and Rehabilitation resettlement Act kam pat don kano kano ka jingai NOC sha ka Sorkar ha ka ba ïadei bad ka jingpyntrei ïa ka lynti rel ha ka jylla”, u la bynrap.
U Bah Chyne u la kdew ba ha shwa u snem 2013, katba ym pat treikam Land Acquisition Act, ka sorkar ka lah ban shim jaka khlem da shim jingbit na ka District Council, hynrei naduh snem 2013 ter ter nga la peit ïa ki record ym don kano kano ka EC ka ba la ai NOC.
“Ka jingpan ïa ka NOC na ka bynta ban shna ïa ka lynti rel ha Ri-Bhoi ka la long naduh u snem 2016 ba ki la pan nyngkong duh, hynrei haduh mynta ngim pat ai kano kano ka jingbit bad ha u snem 2017 ruh ki la pan bad haduh mynta la 39 tylli ki shithi jingpynkynmaw ha ka ba ïa dei bad kane hynrei haduh mynta ka District Council, kam pat ai kano kano ka jingbit”, u la bynrap.
