SHILLONG:
Ka ïingbishar mynta ka sngi Saitjaiñ ka la aiti 5 sngi sha ki pulit na ka bynta ban pynlong ïa ka jingtohkit ïa ki 5 ngut ki bar jylla ki ba la kynnoh donkti ban shoh ïa ki ar ngut ki nongñiah taxi ha Khynnadilad ha ka mied jong ka 18 tarik Jymmang.
Ïa kine ki san ngut ki pulit ki la rah sha ka ïingbishar ha ka sngi Saitjaiñ bad ha ka jingbishar ka ïingbishar ka la ai por 5 sngi ïa ki pulit ban pynlong ïa ka jingtohkit.
“Na ka liang ki pulit ki la pyntip ba ka ïingbishar ka la aipor 5 sngi ïa ki pulit ban leh ïa ka jingtohkit ïa ki 5 ngut ki briew ki ba la shah kem ha ka jingkynnoh donkti ban shoh ïa ki ar ngut ki nongñiah taksi”, la ïathuh u pulit ophisar.
Hashwa ban rah sha ïingbishar la ïalam ruh ïa kine ki san ngut sha Civil Hospital, ban leh ïa ka medical check up ban pynthikna ba ki long ki ba shait bakhlaiñ shawa ban rah sha ïingbishar.
Kum ban shu pynkynmaw ki ar ngut ki nongñiah taksi, ki la ngat ha ka jingmynsaw hadien ba ki 5 ngut ki bar jylla ki la thombor ïa ki ha Khyndailad, ha ka miet jong ka 18 tarik bad ha ka 19 tarik ki pulit ka nongbah Shillong haryngkat ka jingïarap ki pulit ka Guwahati ki la ïoh ban kem noh ïa kine ki runar na Guwahati.
Mynta ka sngi ki nongñiah Taxi kamai, ki la leit ban lum hakhmat ka khyrdop jong ka Sadar Police Station ban dawa ïa ki pulit ban pynidur ïa kine ki runar ki ba thombor ïa ki nongñiah kali.
Hadien, 5 ngut na ki dkhot ka East Khasi Hill Local Taxi Association kynthup ki ar ngut ki nongshakhi ki la leit ban ïakynduh ïa u pulit ophisar ban ithuh ïa kine ki sanngut ki ba la shah kem.
Kane ka long hadien ba mih ka jingartatien na ka dur jong ki ne ki sanngut ba la saphriang ha ki social media, bad kynnoh ba ki pulit ki la shu pynmih ïa ka khubor lamler halor ka jingshahkem.
Na ka liang u pulit ophisar u la kyntu ïa ki ba kin dei ban shaniah ha ki pulit bad ruh ïa ka jingpynithuh ïa kine ki briew ba la shah kem ym lah ban leh da ki pulit hynrei da ka ïingbishar.
