1. Ka kynhun myntri mynta ka sngi ka la pynbeit ïa ka Office Memorandum (OM) jong ka Personnel Department halor ka Reservation Policy bad Reservation Roster. Ka memorandum kaba la ai ha u snem 1972 ha kaba ïadei bad ka jinglait ki kam na ka bynta ki ST bad SC, kaba kdew ba ka jingdon ki kam ba lait ba la pynbna paidbah ki dei ban don 9 lane duna ki kam ba la pynbna na ka bynta kano kano ka jaitbynriew (Khasi Jaiñtia & Garo), kam dei shuh ban treikam, namar la pyntreikam da ka roster point ha ka bhah thungkam. Kane ka mut naduh mynta, ki kam ba lait ba la pynbna paidbah kan long katkum ka roster point bad ym shuh katkum ka jingdon ki kam ba lait ba la pynbna paidbah.
2. Ka kynhun myntri ka la pynbeit thymmai ruh ïa ka OM kaba la ai ha u snem 1974 ha kaba ïadei bad ki kam ba lait ba la bhah kyrpang na ka bynta ki Garo, naduh mynta, ki kam ba lait na ka bynta ki Garo yn pyndap beit tang da ki Garo kiba shong ba sah hapoh ka jylla. Ha ka OM ba mynshwa la shah ïa ki Garo kiba na shabar ka jylla ruh ban pyndap ha kine ki kam ba lait.
3. Ka kynhun myntri ka la pynbeit ruh ïa ka OM jong u snem 2020 ha kaba ïadei bad ka reservation roster na ka bynta ki briew ba don jingduna dkhot met lane kita ki Persons with Disabilities (PWDs), naduh mynta, ka bhah kam ïa ki PWD kan long katkum ka point ba la buh ha ka reservation roster. Kane ka jingpynbeit thymmai ka mut ba ka OM ba mynshwa kam treikam shuh.
4. La wanrah sa kawei pat ka kyndon ha ka OM jong ka Reservation Policy na ka bynta ki kyrtong kiba thep ha ki kam ba lait ha ki district level, kaba kdew ba donkam ba ki kyrtong kiba thep lyngba ka District Selection Committee ki dei ban long kiba tbit ha ka ktien kaba kren ha kane ka district.
Kiwei pat ki rai ba la shim ka kynhun myntri:
5. Ka kynhun myntri ka la mynjur ruh ïa ka jingtyrwa halor ka jingpynbeit ïa ka Meghalaya District Court Ministerial Service 2020. Kane ka pynthikna ba ki nongtrei ka District Court ym lah ban pynkynriah na kawei ka jaka sha kawei pat. Lyngba kane ka jingpynbeit ki District Court ki don ka bor ban ïaid lait bad wengnoh ïa ka Rule No. 33 kaba ïadei bad ka jingthungkam. Ka pynthikna ruh ba ki kyndon ka District Selection Committee (DSC) la pyntreikam lang ha kaba thungkam.
6. Ka kynhun myntri ka la pynbeit ruh ba ka Schedule IV jong ka Meghalaya Delegation of Finance Power Rules 2006, kaba pynkupbor ïa ki DGP/IGP/DIGP/SP ha kaba ïadei bad ka jingpynlut pynsep jong ki tnad bapher bapher.
7. Ka kynhun myntri ka la ïaphylliew jingmut ruh halor ki jingthmu bad ki prokram bapher bapher ha ka tnad Urban ban pynbiang ïa ka ïaid ka ïeng ki kali ha ki nongbah ha kylleng ka jylla. Ka kynhun myntri ka la wanrah ruh ïa ki prokram kiba ïadei bad kumno ban weng ïa ka jingdheng kali ha ka nongbah Shillong, ka la thaw ruh ïa kiwei pat ki jingdonkam na ka bynta ki jaka sor kum ka kyndon ban ai ïa ka umbam umdih kaba bha, ka skywalk hapoh ka nongbah Shillong bad ki jaka ïalehkai ki khynnah rit ha kylleng ki jaka ha ka jylla.
